MANILA, Philippines- Inanunsyo ng Commission on Election (Comelec) na maaaring simulan ang pag-imprenta ng balota sa National Printing Office sa Quezon City sa Biyernes, Enero 24.
Sinabi rin ng Comelec sa kanilang abiso na maaari na ring mag-upload ng updated ballot faces sa Comelec official website simula Huwebes ng gabi.
Nakumpleto na rin ng komisyon ang pagbuo ng mga na-update na ballot faces at nakumpleto na ang serialization ng mga balota. Kasama sa na-update na mga balota ang mga pinakabagong pangalan na iniutos ng Korte Suprema na idagdag.
Sinabi ng Comelec na ang mga naunang naka-imprentang balota at ballot paper trimmings ay humina habang ang pinagkakatiwalaang pagbuo ng automated elections system ay matagumpay na naisagawa ng international certification entity na Pro V&V ng Alabama, USA.
Upang mapabilis ang pag-imprenta ng mga balota, una nang sinabi ng Comelec na gagamitin ang apat na printers sa NPO kasama ang dalawa mula sa Miru na mag-iimprenta ng 1.5 milyong balota kada araw para makayanan ang maikling panahon ng pag-imprenta dahil sa ilang beses na pagsuspinde na dulot ng mga inilabas na temporary restraining order mula sa Korte Suprema.
Samantala, hindi sumang-ayon si Comelec Chairman George Erwin Garcia sa mga suhestiyon na ilagay ang mga pangalan ng diskwalipikadong kandidato na may pending appeals sa balota.
Paliwanag ni Garcia, ang TRO mula sa SC lamang ang makapipigil sa Comelec sa pagpapatupad ng mga desisyon nito kabilang na ang pagtukoy kung sino ang mga kwalipikadong kandidato.
Ayon pa kay Garcia, ang paglalagay ng mga pangalan ng mga kandidato na nadiskwalipika na ay lilikha ng isang “dangerous precedent” sa hinaharap, lahat ng kandidato na maidedeklarang nuisance, mga kandidatong kinansela o diniskwalipika ay hihingi ng kanilang aksyon ngayon upang mapanatili ang kanilang pangalan sa mga balota. Jocelyn Tabangcura-Domenden
