Manila, Philippines – Mariing kinondena ni MPBL Partylist President at 1st nominee Ronwald Munsayac ang ginawa ng Russian-American vlogger na si Vitaly Zdorovetskiy matapos itong masangkot sa pangha-harass at pagnanakaw sa isang mall sa Taguig City noong Marso 31, 2025.
Ayon kay Munsayac, ang asal ni Zdorovetskiy ay isang malinaw na pagpapakita ng kawalang-galang sa batas, kultura, at dangal ng mga Pilipino. Dahil dito, nanawagan siya ng agarang deportasyon at permanenteng pagbabawal sa muling pagpasok nito sa bansa, kasabay ng panawagang ideklarang persona non grata ang naturang vlogger.
“Ang Pilipinas ay hindi isang playground para sa mga dayuhang nais abusuhin ang ating bansa para lamang sa kasikatan sa social media,” diin ni Munsayac.
Ipinahayag din niya ang kanyang pangamba sa lumalaganap na trend ng mga content creators na gumagawa ng mapanganib at iligal na gawain para sa pansariling kasikatan, tulad ng pagpapanggap na natutulog sa gitna ng kalsada na maaaring magdulot ng aksidente.
Ipinangako ni Munsayac na isusulong niya ang mas mabibigat na parusa laban sa mga lumalabag sa batas sa ilalim ng dahilan ng “entertainment” kung siya ay mahalal sa Kongreso. “Hindi dapat gawing dahilan ang social media para sa kawalang-disiplina. Panahon na upang ibalik ang kaayusan, disiplina, at paggalang sa ating mga Pilipinong pagpapahalaga,” aniya.
Nagbabala siya sa lahat ng content creators, lokal man o dayuhan, na hindi palalampasin ng Pilipinas ang anumang pagyurak sa bansa. Sinabi niyang dapat nilang sundin ang batas o harapin ang mabigat na kaparusahan. RNT
