Taytay, Rizal – Wala nang buhay at nakasilid sa sako ang 8 taong gulang na batang babae nang matagpuan sa Block 20, Purok 4, Lupang Arenda, Barangay Sta. Ana, Taytay, Rizal
Ayon sa mga residente sa lugar, kahapon pa umano nila nakita ang sako na ito at ang nasa isip nila ay patay na hayop na itinapon lamang ito.
Pagsapit ng gabi ay dito na umalingasaw ang amoy kung kaya’t agad nila itong itinawag sa barangay at pulis.
Dumating ang PNP-SOCO upang kumpirmahin kung ano ang nilalaman ng naturang sako sapagkat may natanggap silang report na mayroong batang babae na nawawala.
Dito na nakumpirma na ang laman ng sako ay tao nga at ang batang babae na nawawala.
Matapos na ito ay makita ay agad na tinawag ang ina ng nawawalang bata upang kumpirmahin kung ito ba ang batang kanilang pinaghahanap.
Dito na kinumpirma ng ina ng biktima na ang kanyang anak nga ang bangkay na nasa loob ng sako.
Ayon kay PLTCOL Gaylor Pagala, hepe ng Taytay MPS, sa ngayon ay kasalukuyan pang nagsasagawa ng follow-up operation ang Taytay PNP at kumakalap pa ibang ebidenya upang tuluyang malutas ang krimen at kung sino gumawa. Maritess Pumaras
