BEIJING, China – Nagpulong kamakailan sa Beijing ang mga opisyal ng Department of Foreign Affairs (DFA) at Ministry of Foreign Affairs of the People’s Republic of China (MOFA) upang bawasan ang tensyon at ayusin ang ugnayan matapos ang maiinit na palitan ng pahayag kaugnay ng West Philippine Sea.
Ayon kay DFA spokesperson for maritime affairs Rogelio Villanueva, nagkaroon ang dalawang panig ng “open and candid exchange of views” sa mga mahahalagang isyu, kabilang ang maritime concerns. Bagama’t kumpidensyal ang detalye, napagkasunduan umano ng dalawang bansa na tuklasin ang mga posibleng larangan ng “mutually beneficial cooperation.”
Sinabi ni Villanueva na layunin ng pag-uusap na panatilihing bukas ang bilateral at regional channels at mapayapang pamahalaan ang sitwasyon sa dagat habang ipinagtatanggol ang interes ng Pilipinas. Inamin din niya na itinulak ng DFA ang direktang pag-uusap dahil sa “recent incidents and exchanges between the Chinese Embassy and Philippine officials.”
Pinangunahan ni DFA Assistant Secretary Marshall Louis Alferez ang delegasyon ng Pilipinas, habang pinamunuan naman nina Chinese Foreign Ministry Asian Affairs Director-General Liu Jinsong at Boundary and Ocean Affairs Director-General Hou Yanqi ang panig ng China. Isinagawa ang talakayan noong Pebrero 27–28, kasunod ng unang pag-uusap sa Cebu noong Enero 29.
Nilinaw ni Villanueva na hiwalay ito sa Philippine-China Bilateral Consultation Mechanism (BCM) on the South China Sea, na nakabinbin pa ang susunod na pulong.
Samantala, tinuligsa rin niya ang “uninformed criticism” sa provisional understanding sa Ayungin Shoal na nagbigay-daan sa mas ligtas na rotation and reprovisioning (RORE) missions ng mga sundalo sa BRP Sierra Madre.
Ayon sa kanya, kinikilala ng kasunduan ang 2016 Arbitral Award at ang United Nations Convention on the Law of the Sea (UNCLOS).
“There are no valid overlapping maritime claims between the Philippines and China in the West Philippine Sea, and the historic rights derived from the so-called ‘9-dash line’ are without legal effect,” ani Villanueva.
“The Provisional Understanding takes full note of the foregoing, and was drafted specifically to be without prejudice to the Philippines’ national position. The Provisional Understanding does not require the Philippines to seek permission to undertake RORE missions, nor does it allow boarding and inspection of Philippine vessels, and, above all, it does not concede the Philippines’ sovereignty, sovereign rights and jurisdiction,” dagdag pa niya.
Patuloy umanong ipatutupad ng Pilipinas ang kasunduan at inaasahang ganoon din ang gagawin ng China. RNT/MND
