TAGUIG, Philippines – Tumanggap ang Southern Police District (SPD) ng prestihiyosong rekognisyon sa ginanap na Philippine Drug Enforcement Agency (PDEA) Annual Awards 2025 nitong nakaraang Biyernes, Agosto 22.
Ang naturang seremonya, na nagsimula ng alas 9:00 ng umaga sa NCRPO Hinirang Hall, Camp Bagong Diwa, Bicutan, Taguig City, ay naganap upang bigyan ng rekognisyon ang mga di mapantayang kontribusyon ng mga ahensya ng law enforcement gayundin ng kanilang mga tauhan patungkol sa pinaigting na kampanya laban sa ilegal na droga.
Sa kategorya ng Philippine National Police (PNP), nakamit ng SPD na pinamumunuan ni acting District Director P/Brig. Gen. Randy Y. Arceo, ang Best District Drug Enforcement Unit (DDEU) sa pagtatala ng may pinakamaraming nakumpiskang ilegal na droga sa pagsasagawa ng patuloy at positibong anti-drug operations.
Kaugnay nito ay nasungkit naman ni P/Cpl. Richard O. Fabul na miyembro ng SPD-DDEU ang Best District Drug Enforcer Officer dahil sa kanyang propesyonalismo at dedikasyon sa sinumpaang tungkulin sa pakikipaglaban sa ilegal na droga.
Ang naturang okasyon na dinaluhan ni PDEA Director Undersecretary Isagani R. Nerez at Secretary of the Interior and Local Government (SILG) Juanito Victor C. Remulla, na nagsilbing Guest of Honor at Speaker, ang nag-abot ng parangal sa mga awardees na nagpakita ng di mapantayang dedikasyon sa pagtatrabaho pati na rin sa kanilang mahalagang kontribusyon sa anti-drug campaign ng gobyerno.
“This recognition is a proud milestone for the Southern Police District. Being named Best District Drug Enforcement Unit is not only a testament to our accomplishments but also a reflection of the hard work, courage, and integrity of all the men and women of our District Drug Enforcement Unit headed by P/Major Cecilio G. Tomas who have worked tirelessly in the relentless campaign against illegal drugs. These awards further inspire us to intensify our operations and strengthen our commitment to protect our communities and ensure public safety,” ani Arceo. (James I. Catapusan)
