MANILA, Philippines — Muling pinayagan ng Bureau of Fire Protection (BFP) ang pagproseso ng height at age waiver applications, na nagbibigay ng pagkakataon sa mas maiikling aplikante na may natatanging kwalipikasyon o espesyal na kasanayan na makapasok sa ahensya.
Para sa height waiver, kailangang hindi bababa sa 1.52 metro o 4 feet 11 inches ang taas ng mga lalaking aplikante at 1.47 metro o 4 feet 9 inches naman para sa mga babae.
“All height waiver applications are subject to final review and approval by the BFP Height Waiver Committee. Meeting the minimum height does not guarantee acceptance,’’ paglilinaw ng BFP.
Maaaring ikonsidera ang mga aplikanteng may natatanging tagumpay sa akademya, gaya ng honor graduates, consistent academic scholars, at board o bar topnotchers.
Maaari ring tanggapin ang may espesyal na kasanayan sa fire suppression, fire prevention, emergency medical services, at pagpapatakbo ng heavy equipment gaya ng aerial ladder at rescue tender. Maaari ring makwalipika ang may professional driver’s license na may restriction codes two at three.
Isasaalang-alang din ang mga aplikanteng may Technical Education and Skills Development Authority mechanic trade test certificate at kasanayan sa pump operation, auto diesel engine, auto electrical troubleshooting, at iba pang kakayahang kailangan sa uniformed service.
“Prepare your documents and contact the nearest Regional PRAISE Committee or BFP Office in your locality for wide acceptance of your applications,’’ payo ng BFP sa mga interesadong aplikante.
Inatasan ni BFP Chief Directorial Staff Chief Supt. Andrew Mendova ang mga regional director na tumanggap ng height at age waiver applications at tiyaking maipaaalam ito sa kanilang mga nasasakupan.
Sinabi rin ng BFP na ang 40-hour Basic Occupational Safety and Health training na nagsimula noong Hulyo 20 ay magpapahusay sa kakayahan ng mga bumbero na matukoy ang mga hazard at mas mapalakas ang kanilang emergency rescue operations habang pinangangalagaan ang kanilang kaligtasan.
“We need our personnel to be safe so they can save and protect the public,” pahayag ni Mendova para kay BFP officer-in-charge Wilberto Rico Neil Kwan Tiu.
Sa limang araw na pagsasanay, tuturuan ang mga tauhan kung paano tukuyin ang safety, health, at environmental hazards, magtakda ng tamang control measures, tumugon sa workplace emergencies, at lumahok sa emergency drills.
Pinili bilang mga kalahok ang mga tauhan mula sa Special Rescue Force National Headquarters at National Capital Region. Santi Celario
