MANILA, Philippines – Nagpasalamat si outgoing Bureau of Immigration (BI) chief Norman Tansingco nitong Miyerkules, Setyembre 11 sa oportunidad na ipinagkaloob na makapaglingkod sa administrasyon ni Pangulong Ferdinand Marcos Jr.
Matatandaan na ngayong linggo ay sinibak sa pwesto si Tansingco matapos ang pagtakas sa bansa ni dismissed Bamban, Tarlac Mayor Alice Guo.
“Allow me then to express my gratitude to [President] Ferdinand Romualdez Marcos, Jr. for the opportunity to serve under his administration. The past two years have been filled with optimism, challenges and determination,” saad sa pahayag ni Tansingco.
Aniya, ang tinutukan niya sa kanyang termino ay ang BI na “to control the borders at the international ports of entry and exit, and prevent Filipinos from being trafficked abroad, among others.”
Si Justice Secretary Jesus Crispin Remulla ang humiling ng dismissal ni Tansingco na inakusahan niya na walang ginagawa tungkol sa umano’y pagbibigay ng working visas sa mga pekeng korporasyon dahilan ara makapasok sa bansa ang illegal gambling workers.
Sinupalpal din ni Remulla si Tansingco sa hindi agad pagsusumbong na nakatakas na pala ng bansa si Guo.
Nauna pa itong naisapubliko ni Senador Risa Hontiveros.
Sa kabila ng gusot, kinilala naman ni Tansingco ng suporta ng opisina ni Remulla.
“I wish to acknowledge the support of the BI Board of Commissioners, and Offices of the DOJ Secretary and DOJ Supervising Undersecretary, as we crafted and implemented those reforms,” aniya.
Itinalaga si Joel Anthony Viado bilang officer-in-charge ng BI. RNT/JGC
