MANILA, Philippines – Ipagpapatuloy ngayong Lunes, Disyembre 15, ang deliberasyon ng bicameral conference committee para sa panukalang P6.793-trilyong national budget para sa 2026.
Noong Linggo ng hapon, tinalakay ng bicam panel ang panukalang pondo ng Department of Public Works and Highways (DPWH) sa loob ng mahigit tatlong oras, simula 4:50 p.m., sa ikalawang araw ng pagdinig. Dumalo sa pulong si Public Works Secretary Vince Dizon.
Inimbitahan si Dizon upang ipaliwanag ang teknikal na detalye ng apela ng DPWH na maibalik ang mga pondong binawas sa kanilang panukalang badyet dahil sa pagbabawas batay sa Construction Materials Price Data (CMPD).
Ayon kay Dizon, hindi nila hinihiling na ibalik ang mga infrastructure project na inalis sa panukalang 2026 budget, at idinagdag niyang inaasahang bababa ang gastos sa mga materyales ng proyekto.
Sinuspinde ang sesyon ng 8:14 p.m., at muling ipinagpatuloy ng 10:33 p.m.
Kalaunan, sina Rep. Mikaela Suansing, chair ng House Appropriations Committee, at Sen. Sherwin Gatchalian, chair ng Senate Finance Committee, ay nagpasya na ipagpaliban ang deliberasyon hanggang 4:00 p.m. ng Lunes.
Hanggang ngayon, hindi pa aprubado ang 2026 budget ng DPWH.
Orihinal na nakatakdang magsimula ang bicameral hearing noong Disyembre 12, ngunit inilipat sa Disyembre 13 matapos humiling ang technical staff ng House at Senado ng karagdagang araw upang ayusin ang budget matrix at pag-isahin ang magkakaibang probisyon at halaga, ayon kay Senate President Tito Sotto III.
Mas maaga namang sinabi ng Malacañang na ang enrolled copy ng 2026 General Appropriations Bill ay maaaring isumite kay Pangulong Ferdinand “Bongbong” Marcos Jr. bago ang Araw ng Pasko para sa kanyang pagsusuri at pag-apruba. RNT/MND
