MANILA, Philippines- Matapos ang magkasunod na barya-baryang taas-presyo sa mga produktong petrolyo, magpapatupad naman ng “big-time oil price hike” ang mga kompanya ng langis sa bansa na ipatutupad bukas ng umaga.
Sa abiso kahapon ng mga kompanya ng langis sa bansa na pinangunahan ng Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz at Phoenix Petroleum, magpapatupad sila ng malakihang dagdag-presyo na P2.65 sa kada litro ng gasolina at P2.60 naman sa kada litro ng diesel at kerosene na magiging epektibo alas-6 bukas ng umaga.
May dagdag-presyo rin sa nasabing mga produkto sa kahalintulad na halaga ang kompanyang Caltex (CPI) na magiging epektibo alas-12:01 bukas ng madaling araw habang ang kompanyang CleanFuel ay magiging epektibo alas-4:01 bukas ng hapon.
Ang ipatutupad na malakihang dagdag-presyo sa mga produktong petrolyo ay bunsod sa patuloy na paggalaw ng presyuhan nito sa pandaigdigang merkado. JR Reyes
