MANILA, Philippines- Hinarang ng mga tauhan ng Bureau of Immigration (BI) ang dalawang biktima ng trafficking sa Ninoy Aquino International Airport (NAIA) Terminal 3 matapos magprisinta ng mga pekeng dokumento na binili nila sa Facebook.
Ang mga biktima na nasa 51 at 30 taong gulang ay naharang noong Marso 19 matapos tangkaing maglakbay patungong Oman sakay ng isang Emirates flight na biyaheng Dubai.
Parehong iginiit ng dalawang biktima, isang lalaki at isang babae, na papunta sila sa Arab region para bisitahin ang kani-kanilang asawa, na anila ay overseas Filipino worker (OFWs).
Gayunman, matapos ang pagsisiyasat ng mga frontline na opisyal ng imigrasyon, sila ay isinangguni para sa pangalawang inspeksyon pagkatapos mapansin ang mga hindi pagkakapare-pareho sa kanilang mga pahayag at mga dokumento.
Parehong nagsumite ng mga marriage certificate na nagpapakita ng kanilang sinasabing kasal sa OFW.
Sa pangalawang inspeksyon, inamin nilang binili nila ang mga dokumento sa mga fixer na nakilala nila sa Facebook. Ibinahagi nila na inutusan silang magpanggap bilang mga turista, na itinataguyod ng kanilang mga pekeng asawa.
Isinailalim sa forensic document inspection ang kanilang mga marriage certificate, na nagpapatunay na peke nga ang mga ito.
Nabatid na pareho silang pinangakuan ng trabaho bilang isang pintor ng kotse at isang manggagawa sa salon sa Oman, na may inaasahang sweldong 250 Riyal lamang.
Sinabi ni BI Commissioner Norman Tansingco na pinaalalahanan ang mga nag-aapply bilang OFWs na ang mga dokumentong kinukuha sa pamamagitan ng hindi lehitimong pamamaraan ay malamang na peke o tampered. JAY Reyes
