Binondominium 2, pinasimulan ni Isko; ika-6 na pabahay sa Manilenyo

MANILA, Philippines – PINANGUNAHAN nina Manila Mayor Isko Moreno Domagoso PORMAL ang groundbreaking ng Binondominium 2 sa San Nicolas, Maynila — ang ika-anim na vertical housing project ng lungsod sa ilalim ng kanyang administrasyon.

Nabatid na itatayo ang gusali sa 405-square-meter na lote na may kabuuang floor area na 6,277.5 square meters. Maglalaman ito ng 98 residential units na tig-40 square meters bawat isa.

Bawat unit ay may dalawang kuwarto, sariling palikuran at paliguan, kusina, kainan at sala na sapat para sa disenteng pamumuhay ng mga pamilyang benepisyaryo.

Hindi rin pahuhuli sa pasilidad ang gusali dahil magkakaroon ito ng dalawang elevator, daycare center, multi-purpose hall, roof deck at isang opisina para sa maayos na pamamahala ng komunidad.

Sa kanyang talumpati, naging emosyonal si Domagoso nang balikan ang kanyang kabataan sa Tondo at ang hirap ng kanilang pamilya na paulit-ulit na napalayas dahil sa kahirapan.

Ayon sa alkalde, naranasan nilang mawalan ng tirahan kapag hindi nakabayad ng upa, at hindi tiyak kung may bahay pa silang babalikan matapos pumasok sa eskwela.

Binalikan din ni Yorme ang kanyang pangako noong 2019 na magtatayo ng pabahay para sa mga taga-Maynila. Bagama’t naantala ng pandemya ang ilang plano, hindi umano ito naging hadlang para ituloy ang proyekto.

Giit pa ng alkalde, makatarungan lamang na ilaan ng lungsod ang daan-daang milyong piso para sa pabahay, sabay banggit sa linya ni dating Pangulong Ramon Magsaysay na “Those who have less in life must have more in law.”

Hinimok din ni Domagoso ang mga magiging benepisyaryo na pangalagaan ang gusali at panatilihin ang disiplina sa komunidad upang tumagal ang proyekto.

Tiniyak naman ng alkalde na magpapatuloy ang pamumuhunan ng lungsod sa tinawag niyang MBN o Minimum Basic Needs — pabahay, edukasyon, kalusugan at trabaho — kabilang ang planong bagong gusali ng Pamantasan ng Lungsod ng Maynila at pagpapatayo ng ospital sa Tondo. JAY Reyes