MANILA, Philippines – Inalis na ng pamahalaan sa pamamagitan ng Department of Agriculture (DA) ang ban sa pag-import ng wild at domestic birds mula Argentina, Romania, at Turkey.
Sa pahayag nitong Martes, Oktubre 28, sinabi ng DA na nag-isyu si Agriculture Secretary Francisco P. Tiu Laurel Jr. ng magkakahiwalay na memorandum orders na nagpapahintulot sa pagpapatuloy ng pag-aangkat mula sa tatlong bansa “following the containment of highly pathogenic avian influenza (HPAI) in those regions.”
Tinukoy ni Tiu Laurel sa pag-aalis ng import ban ang kawalan ng bagong mga outbreak at official clearance mula sa World Organization for Animal Health (WOAH).
Sinabi ng DA na ang temporary import ban ay inilagay bilang pag-iingat at proteksyon sa lokal na poultry industry ng bansa sa pagkalat ng bird flu.
Ayon pa sa Agriculture Department, ang desisyong alisin ang import ban ay batay na rin sa risk assessments na isinagawa ng Bureau of Animal Industry (BAI). RNT/JGC
