OCCIDENTAL MINDORO, Philippines – Inaresto ng mga awtoridad noong Sabado ng umaga sa Mamburao, Occidental Mindoro ang isang 37-anyos na lalaking boat captain dahil sa paggamit ng mga hindi lisensyadong crew sa pangingisda.
Ayon sa ulat ng Philippine National Police nitong Linggo, isinagawa ang operasyon sa pamamagitan ng joint seaborne patrol na pinangunahan ng Occidental Mindoro Maritime Police Station, kasama ang Mamburao Municipal Police Station, 402nd Marine Company ng Regional Mobile Force Battalion, at 2nd Provincial Mobile Force Company.
Sakay ng isang commercial fishing vessel, nagsagawa ng inspeksyon ang mga awtoridad at natuklasan ang paglabag.
Nasamsam sa operasyon na isinagawa humigit-kumulang 11 kilometro mula sa Barangay Tayamaan ang mga asset na may kabuuang halaga na PHP6.96 milyon, kabilang ang PHP500,000 na halaga ng sari-saring isda at isang fishing vessel na nagkakahalaga ng PHP6 milyon.
Dinala ang boat captain sa Mamburao Municipal Police Station para sa dokumentasyon at legal na proseso, habang isasailalim din siya sa administrative proceedings sa harap ng Bureau of Fisheries and Aquatic Resources Adjudication Board. RNT/MND
