MANILA, Philippines – Binigyang-diin ni Senator Christopher “Bong” Go ang kahalagahan ng pagpapabilis ng tulong ng gobyerno para sa mahihirap na pasyente sa pag-aalis sa mga burukratikong hadlang kung saan kinakailangan pang bumisita sa iba’t ibang tanggapan para lamang makahingi ng tulong-medikal.
Ipinaliwanag ni Senador Go na may malaki pa ring kakulangan sa tulong para sa mga pasyente.
Binanggit niya na kapag may nagkakasakit, ang pinansiyal na pasanin ay kadalasang lumalampas sa halagang sakop ng PhilHealth.
Dahil dito, ang mga pasyente ay madalas na bumabaling sa ibang ahensya para magmakaawa sa tulong ngunit kinakapos pa rin.
Sa kabutihang palad, sa pagkakaroon ng Malasakit Centers, ay mayroon na silang maaasahang pasilidad na nalalapitan para sa tulong.
Ang Malasakit Centers, na itinatag bilang one-stop shop para sa mahihirap na pasyente, ay naging pundasyon ng krusada sa reporma sa kalusugan ni Senator Go.
Pinagsama-sama ng mga sentrong ito ang tulong mula sa mga pangunahing ahensya ng gobyerno, kabilang ang Department of Health (DOH), Philippine Charity Sweepstakes Office (PCSO), Philippine Health Insurance Corporation (PhilHealth), at Department of Social Welfare and Development.
Sa pagdinig ng Senate committee on health na pinangunahan ni Go, kinumpirma ni DSWD Assistant Secretary Ulysses Aguilar na gumawa ang ahensya ng mga hakbang upang maisama ang mga serbisyo nito sa Malasakit Centers.
Inanunsyo ng DSWD na inamyendahan ang Memorandum Circular No. 16 upang isama ang Malasakit Centers bilang access point sa mga programang tulong-medikal nito, tungo sa pagpapagaan ng proseso para sa mahihirap na pasyente.
Ang Memorandum Circular No. 16 ay binagong patnubay para sa programang Assistance to Individuals in Crisis Situations (AICS) ng DSWD. Ang programa ay naglalayong magbigay ng pinansyal, materyal, at psychosocial na suporta sa mga indibidwal at pamilyang nahaharap sa emergency o krisis.
Inamyenda ang circular upang magpabilis ang proseso, mapalawak ang coverage ng tulong, at kasama ang Malasakit Centers bilang lugar sa on-site na pagpoproseso ng tulong-medikal.
“Sa ngayon po, bukod sa transportation at sa food assistance na naibibigay po natin sa mga lumalapit po sa atin sa Malasakit Center, nakakatulong din po kami sa medical assistance sa kanila,” paliwanag ni Aguilar.
Ibinaling ni Senator Go ang talakayan sa isyu ng year-end administrative cutoffs, partikular ang pagsuspinde sa Guarantee Letters (GLs) dahil sa pagsasara ng accounting books. Binigyang-diin niya na dapat ay tuloy-tuloy ang pagbibigay ng tulong sa mga pasyente, lalo sa panahon ng Kapaskuhan.
“Sabi ko nga po, walang deadline po ang pagtulong sa mga kababayan natin dahil wala naman pong pinipili ‘yung araw na nagkakasakit tayo. What if panahon ng Pasko, nagkasakit ‘yung mga kababayan natin, hintayin pa nilang mag-January 2 para maka-avail po ng tulong mula sa DSWD? Sana walang deadline muna ito, walang cut-off, cut-off ang serbisyo natin.”
Nilinaw ni Assistant Secretary Aguilar na habang ang cut-off ay nalalapat sa guarantee letters dahil sa taunang proseso ng clearing para sa mga pagbabayad, hindi nangangahulugang hihinto ang tulong medikal ng ahensya. RNT
