Bong Go: Prinsipyo ni Duterte na protektahan ang inosenteng buhay

MANILA, Philippines – Binigyang-diin ni Senator Christopher “Bong” Go na ang prinsipyong itinataguyod ni dating Pangulong Rodrigo Duterte sa paglaban sa kriminalidad— ay protektahan ang mga inosenteng buhay at tiyaking naipatutupad ang batas sa loob ng mga hanggahan nito.

Muling iginiit ni Go na bagama’t kilala ang administrasyong Duterte sa matigas nitong paninindigan laban sa krimen, partikular sa kalakalan ng droga, malinaw ang mga direktiba ng dating Pangulo na hindi dapat mapahamak ang mga inosenteng buhay at dapat kumilos nang responsable ang mga alagad ng batas.

“Sabi nga ni Pangulong Duterte noon, wala siyang inutos pumatay ng inosente. Galit siya at gusto niyang tugisin ang mga ninja cops, ang mga abusadong pulis na naghahasik ng lagim sa droga, pumapatay, at kasabwat ng sindikato,” sabi ni Go na tumutukoy sa pagnanais ni Duterte na mawalis ang katiwalian sa loob ng puwersa ng pulisya.

Ipinunto ng senador na sa kabila ng pagdoble ng suweldo ng mga pulis sa mga unang taon ng termino ni Duterte para itaas ang integridad ng PNP, may mangilan-ngilan pa rin na gumagawa ng kriminal na aktibidad at ito aniya ay nagpadismaya sa dating presidente Duterte.

Tinukoy din ni Go ang imbestigasyon ng Senado noong 2019 na tumalakay sa “ninja cops”—mga pulis na sangkot sa mga iligal na aktibidad—na nagbibigay-diin sa malinaw na paninindigan ni Duterte sa accountability.

“Kung matatandaan natin, na-imbestigahan ito sa Senado noon pa, kasi ito nga ‘yung rason na galit na galit si PRRD sa mga ganitong pulis. Dinoble na niya ang sweldo, pero pumapatay at nagloloko pa rin,” ani Go.

Ang posisyon ni Duterte sa isyung ito ay dati nang pinagtibay sa isang pagdinig sa Senado kung saan ibinasura niya ang paniwala ng pagbibigay ng insentibo sa trabaho ng pulisya na may mga pabuya sa pananalapi.

“Bakit ako magbabayad sa kanila, trabaho man nila ‘yan?,” sabi ni Duterte, na idiniin na ang mga pulis ay dapat gampanan ang kanilang tungkulin nang walang inaasahang rewards.

Sinabi ni Go na ang matatag na diskarte ni Duterte ay nag-ugat sa isang tunay na pagnanais na protektahan ang mga Pilipino habang pinapanatili ang panuntunan ng batas.

“Tulad po ng sinabi ni PRRD noon sa pulisya, gampanan po nila ang kanilang tungkulin, proteksyunan ang buhay at kapakanan ng mga inosente sa paraang naaayon sa batas,” sabi ni Go.

“Noong ako’y nagseserbisyo kasama si Pangulong Rodrigo Duterte, palagi kong naririnig na sinasabi niya, ‘Just do what is right.’ At ‘yan ang patuloy kong sinusunod. Gawin lang ang tama, unahin ang kapakanan ng mahihirap, at hindi ka magkakamali.” RNT