MUNTINLUPA, Philippines – Pinangunahan ni Bureau of Corrections (BuCor) Director General Gregorio Pio Catapang Jr. ang pamamahagi ng mga donasyon para sa mga biktima ng Bagyong Uwan sa Lungsod ng Muntinlupa.
Personal na itinurn-over ni Catapang ang mga donasyon—na mula sa mga opisyal at empleyado ng BuCor—kay Caridad G. Molo, Assistant Department Head II ng Social Services Department ng Muntinlupa.
Layunin ng inisyatiba na maiparating ang suporta at malasakit ng ahensya sa mga pamilyang matinding naapektuhan ng bagyo.
Ayon kay Catapang, mas pinili ng BuCor na ialay ang anibersaryo ng pagkakatatag ng ahensya hindi sa karaniwang pagdiriwang, kundi sa pagsasaliksik sa sarili, panalangin, at pagpapatibay ng kanilang paninindigan bilang mga lingkod-bayan. Aniya, mahalagang maipakita ng mga nasa serbisyo publiko ang empatiya at habag, lalo na sa panahong sinusubok ang bansa ng kalamidad.
