MANILA, Philippines – Ayon sa Philippine Institute of Volcanology and Seismology (Phivolcs) nitong Lunes, Enero 26, tumaas ang aktibidad ng Taal Volcano sa Batangas.
Naitala ang 23 volcanic tremors sa nakalipas na 24 oras, bawat isa tumagal ng dalawa hanggang tatlong minuto.
Dagdag pa ng ahensya, nagkaroon ng 11 volcanic earthquakes ang bulkan noong Enero 25, at 9 noong nakaraang araw.
Mula Enero 12 hanggang 23, mababa lamang ang seismic activity na may 25 volcanic earthquakes at 10 volcanic tremors sa loob ng 12 araw.
Ipinapaliwanag ng Phivolcs na ang volcanic earthquakes ay dulot ng proseso sa loob ng aktibong bulkan, habang ang volcanic tremors ay tuloy-tuloy na low-frequency seismic signals.
Sa pinakahuling pagmamanman, nagbuga ang Taal ng 271 metric tons ng sulfur dioxide, na itinuturing na “weak emission.”
Walang nakitang mainit na lava o volcanic smog sa crater lake sa nasabing panahon.
Nanatili sa Alert Level 1 ang Taal Volcano, na nangangahulugang mababa ang antas ng volcanic unrest.
Ngunit binigyang-diin ng Phivolcs na nananatiling “abnormal condition” ang bulkan at hindi dapat ipakahulugan na tapos na ang banta o posibilidad ng pagsabog. RNT/MND
