MANILA, Philippines- Itinakda ang bicameral Commission on Appointments (CA) deliberations sa appointment ni Gilberto Teodoro Jr. bilang Kalihim ng Department of National Defense (DND) sa sunod na Miyerkules, Setyembre 13, 2023.
Tumakbo si Teodoro sa pagka-senador noong 2022, at kasunod ang deliberasyon sa kanyang kumpirmasyon matapos ang one-year prohibition sa appointment ng mga kandidatong natalo sa eleksyon noong nakaraang taon.
Sinabi ni Assistant Minority Leader and Surigao del Sur Representative Johnny Pimentel na magsasagawa rin ang CA ng confirmation hearings sa nominasyon ng ilangl ambassador– Charlie Manangan para sa Iraq, at Kira Azucena para sa Niue at New Zealand.
Gayundin, gugulong ang confirmation hearing sa appointment ni Erlinda Uy bilang regular member ng Judicial and Bar Council (JBC), na kumakatawan sa Integrated Bar of the Philippines (IBP).
Kabilang sa appointments na naghihintay pa sa pagpayag ng CA ang kay Health Secretary Teodoro Herbosa, at Foreign Service Officer Class IV Catherine Sy, kasama ang 24 newly promoted senior military officers.
Kasama sa mga opisyal sina Steve Crespillo para sa Lieutenant General; Arvin Lagamon para sa Major General; at Benedict Balaba, Lloyd Cabacungan, Thad Rufino Candelario, Ramon Flores, Nasser Lidasan, Joselito Lopena, Jose Jesus Luntok, Dennis Pacis, Ivan Papera, Ranulfo Sevilla, and Fernando Venture para sa Brigadier General.
Gayundin hinihintay pa ang kumpirmasyon nina Brendo Casaclang, Peter Jempsun De Guzman, Richard Gonzaga, at Salvador Lavapie Jr. para sa Commodore; at Elba Cruz, Antonio Esmero, Suharto Mangudadatu, Roger Mercado, Elmer Nicolas, Rolando Ong, at Rogelio Padre Sr. para sa Colonel. RNT/SA
