MANILA, Philippines — Muling pinagtibay ng Association of Southeast Asian Nations (ASEAN) ang kolektibong layunin nitong pabilisin ang paglipat ng rehiyon tungo sa carbon neutrality at sustainable growth pagsapit ng 2030.
Sa inilabas na pahayag ng ASEAN chair nitong Sabado, ikinatuwa ng regional bloc ang progreso sa pagpapatupad ng ASEAN Regional Investment Action Plan 2025-2030 na naglalayong makahikayat ng foreign investments para sa green transition at mga priority recovery sectors matapos ang pandemya.
Kabilang sa mga prayoridad na sektor ang carbon capture and storage, biofuels, medical devices, solar photovoltaic equipment, veterinary healthcare, at green at sustainable building materials.
Ayon sa ASEAN chair, makatutulong ito upang maiposisyon ang ASEAN bilang iisang investment destination para sa sustainable investments habang pinabibilis ang green transition at inclusive economic growth ng rehiyon.
Muling pinagtibay rin ng mga lider ng ASEAN ang commitment sa pagpapatupad ng ASEAN Plan of Action for Energy Cooperation 2026–2030 na layong palakasin ang energy security at resilience ng rehiyon.
Nakatuon ang plano sa diversification ng energy sources, pagpapalawak ng renewable at emerging technologies, pagpapahusay ng energy efficiency, at mas matibay na kooperasyon sa petroleum security, smart grid digitalization, at carbon capture, utilization, and storage (CCUS).
“We welcomed the new aspirational 2030 targets of a 40 percent reduction in energy intensity, a 30 percent renewable energy share in Total Primary Energy Supply, and a 45 percent renewable share in installed power capacity,” ayon sa statement.
Ipinapakita umano nito ang matibay na determinasyon ng ASEAN na bumuo ng mas sustainable at competitive na regional energy system.
Inaasahan din ng ASEAN ang pagpapatupad ng ASEAN Strategy for Carbon Neutrality Work Plan na magsisilbing gabay sa pagsasakatuparan ng ASEAN Strategy for Carbon Neutrality sa pamamagitan ng malinaw na priorities, shared objectives at coordinated action para sa decarbonization ng regional value chains.
Ayon sa regional bloc, malaki ang potensyal ng naturang estratehiya upang maisulong ang sustainable at resilient economic growth habang pinatitibay ang posisyon ng ASEAN bilang kaakit-akit na destinasyon para sa green investments.
Kinilala rin ng ASEAN ang kahalagahan ng yamang dagat, karagatan at freshwater resources sa ilalim ng pagpapatapos ng Roadmap of the ASEAN Blue Economy Implementation Plan 2026–2030.
Layunin ng roadmap na magsulong ng mga praktikal at angkop na inisyatiba upang mapaunlad ang physical, financial, human, social at natural capital ng blue economy ng ASEAN.
Nagpahayag din ng optimismo ang mga miyembrong bansa sa inaasahang resulta ng ASEAN Blue Carbon and Finance Profiling project na magmamapa sa blue capital assets at tutukoy sa mga sustainable investment opportunities para sa blue economy agenda ng rehiyon. RNT/JGC
