Nakapagtala ang DOH ng 15,122 kaso mula Oktubre 4 hanggang 17, mas mataas kumpara sa 12,929 kaso noong Setyembre 20 hanggang Oktubre 3.

Gayunman, mas mababa pa rin ang kabuuang bilang ng mga kaso ngayong taon kumpara noong nakaraang taon. Mula Enero 4 hanggang Oktubre 31, umabot sa 142,246 ang naitalang kaso, 18 porsiyentong mas mababa sa 173,364 noong kaparehong panahon ng 2025.

Ayon sa DOH, alinsunod sa karaniwang seasonal pattern ng ILI ang pagtaas ng mga kaso. Nananatili naman sa 0.06 porsiyento ang case fatality rate.

Pinakamalaking porsiyento ng pagtaas ng kaso ang naitala sa Western Visayas, Mimaropa at Central Visayas. Samantala, 13 probinsya at highly urbanized cities sa 10 rehiyon ang nakapagtala ng pagtaas ng mga kaso sa kanilang mga lugar, karamihan ay nasa National Capital Region.

Dahil dito, pinayuhan ng DOH ang publiko na takpan ang bibig at ilong kapag umuubo o bumabahing at manatili sa bahay kapag may sintomas ng flu-like illness.

Pinayuhan din ang publiko na tiyaking maayos ang bentilasyon sa mga kulob na lugar at hinikayat ang mga vulnerable at high-risk group na magpabakuna laban sa sakit.

Ayon sa World Health Organization, ang ILI ay impeksiyon sa paghinga na may lagnat na 38 degrees Celsius o mas mataas at ubo, na nagsimula sa loob ng nakalipas na 10 araw. Hindi lahat ng kaso ay dulot ng influenza dahil maaari ring magdulot ng kaparehong sintomas ang ibang respiratory virus. Jocelyn Tabangcura-Domenden

The post Mga kaso ng flu-like illness sa bansa, tumaas ng 17% — DOH first appeared on Remate Online.

Ayon kay Department of Health (DOH) Undersecretary Albert Domingo nitong Biyernes, umaabot ng isang oras ang biyahe ng mga residente patungo sa pinakamalapit na pasilidad pangkalusugan bago muling buksan ang health station.

May mga resettlement area ng mga Aeta sa naturang sitio.

“Mahalaga po ito… ‘yung mapalapit para sa ating mga kababayan ‘yung tinatawag na primary healthcare or ‘yung mga serbisyo ba, na kapag mayroon pasimple lang na nagkakaroon ng lagnat sa gitna na gabi,” pahayag ni Domingo sa programang Bagong Pilipinas Ngayon ng state television na PTV.

Maglalagay naman ang lokal na pamahalaan ng San Clemente ng low earth orbit satellite o Starlink upang maisagawa ang telemedicine sa lugar.

“Pwedeng mag-usap ‘yung doktor, si doktora na nasa RHU (rural health unit) doon sa bayan, doon sa midwife or kahit walang midwife, ‘yung dalawa na barangay health worker na onsite malapit doon sa ating mga kababayan,” dagdag ni Domingo.

Dating COVID-19 isolation facility ang health station na inayos at ni-renovate ng lokal na pamahalaan upang magamit muli.

Tutulong naman ang DOH sa pagbibigay ng mga kagamitan at materyales para sa pasilidad. RNT/MDS

The post Health station sa liblib na sitio sa Tarlac, muling binuksan first appeared on Remate Online.

Batay sa datos ng Romblon Provincial Epidemiology and Surveillance Unit (PESU) para sa morbidity weeks 1 hanggang 44, 786 na pasyente ang gumaling habang pito ang namatay.

Pinakamaraming kaso ang naitala sa San Fernando na may 238, sinundan ng Cajidiocan na may 198. Sa kabuuang bilang, 312 ang kumpirmado sa laboratoryo, 137 ang probable at 344 ang suspected cases.

Minomonitor din ng Provincial Health Office (PHO) ang lima pang sakit sa parehong panahon: typhoid fever, influenza-like illness, hand, foot and mouth disease (HFMD), leptospirosis at measles-rubella.

Nakapagtala ng 212 kaso ng typhoid fever, kung saan 61 ang mula sa bayan ng Romblon at 55 sa Odiongan. Sa mga pasyente, 210 ang gumaling habang isa ang umalis sa ospital laban sa payong medikal.

Mayroon ding 108 kaso ng influenza-like illness, kabilang ang 106 suspected at dalawang kumpirmado. Pinakamarami ang naitala sa Odiongan na may 34, kasunod ang San Agustin na may 28. Walang nasawi sa sakit na ito.

Umabot naman sa 42 ang kaso ng HFMD, na karamihan ay mga batang edad 10 pababa. Pitong kaso ang naitala sa Odiongan at pito rin sa Magdiwang. Walang naitalang pagkamatay.

Nakapagtala rin ang lalawigan ng 17 kaso ng leptospirosis, kabilang ang 14 suspected at tatlong probable cases. Isa ang namatay habang 16 ang gumaling. Pinakamarami ang kaso sa Cajidiocan na may apat, kasunod ang Odiongan na may tatlo.

Samantala, 11 ulat ng measles-rubella ang naitala. Tatlo ang mula sa Ferrol at dalawa sa bayan ng Romblon. Sa mga ito, isa ang kumpirmadong rubella infection, walo ang itinuring na non-measles/non-rubella cases at dalawa ang hinihintay pang resulta. Walang nasawi.

Sa isang advisory, binigyang-diin ng Provincial Department of Health Office (PDOHO) Romblon ang kahalagahan ng pakikilahok ng komunidad upang maiwasan ang pagkalat ng mga sakit na dala ng lamok at kontaminadong tubig.

“Staying informed is our first line of defense,” ayon sa tanggapan.

Hinimok din nito ang mga residente na panatilihing malinis ang kapaligiran, sundin ang wastong kalinisan at mga hakbang sa pag-iwas sa sakit, at agad kumonsulta sa doktor kapag nakararanas ng mga sintomas. RNT/MDS

The post Romblon, nakapagtala ng 793 kaso ng dengue, 7 nasawi sa loob ng 10-buwan first appeared on Remate Online.

Kabilang sa mga sintomas nito ang lagnat, pananakit ng katawan o kalamnan, panghihina, pagsusuka, pagdurugo ng gilagid o ilong, at pagkakaroon ng mga pantal sa katawan.

Ayon sa DOH, mahalaga ang maagang pagkonsulta sa health center o health facility upang maiwasan ang malubhang komplikasyon na maaaring magdulot ng pagkamatay.

Hinimok din ng ahensya ang publiko na sundin ang 4Ts na kinabibilangan ng taob, taktak, tuyo at takip upang maiwasan ang pagdami ng mga lamok at makatulong sa pag-iwas sa dengue.

Sa Maynila, batay sa datos ng Manila Health Department, umabot na sa 4,579 ang kaso ng dengue ngayong taon, kung saan 13 ang nasawi.

Dahil dito, puspusan ang Manila LGU sa pagsasagawa ng mga hakbang sa paglilinis at paghikayat sa publiko na magpakonsulta sa doktor kapag may posibleng sintomas ng dengue. Jocelyn Tabangcura-Domenden

The post DOH, nagbabala laban sa pagbalewala sa sintomas ng dengue first appeared on Remate Online.

Inirekomenda ng DOH na salain at iproseso muna ang maruming tubig na may halong putik upang maiwasan ang pagbabara ng filtration system at matiyak ang pagiging epektibo nito.

Ayon sa DOH, maaaring magsagawa ng paunang paglilinis kung mataas ang kontaminasyon ng tubig o may halong debris at iba pang dumi.

Ipinaliwanag din ng ahensya na nakadepende sa laki ng butas ng filter ang kakayahan nitong sumala ng dumi. Halimbawa, hindi kayang salain ng 0.1-micron filter ang mga partikulong mas maliit pa rito.

Pinayuhan din ang publiko na makipag-ugnayan sa kanilang local health offices para sa tamang paggamit ng chlorine tablets at tiyaking rehistrado sa Food and Drug Administration (FDA) ang mga ginagamit na water filter.

Maaaring tiyakin ang rehistro ng mga produkto sa https://verification.fda.gov.ph. Jocelyn Tabangcura-Domenden

The post DOH, nagbabala vs pagdepende lamang sa water devices para sa ligtas na inuming tubig first appeared on Remate Online.

Ayon sa mga opisyal ng kalusugan ng county at estado, nasawi ang bata sa Lewis County sa hilagang bahagi ng New York.

“I am heartbroken to learn that a child in Lewis County has died after contracting measles,” pahayag ni New York Governor Kathy Hochul.

“As a mother and grandmother, I cannot imagine what this family is going through,” dagdag niya.

Iniugnay rin ni Hochul ang pagkamatay sa mga polisiya sa kalusugan ng administrasyong Trump. Aniya, isa itong “a devastating reminder of what’s at stake when Washington deliberately erodes decades of progress in protecting Americans from preventable illnesses.”

Nararanasan ngayon ng United States ang pinakamalalang measles outbreak sa loob ng 35 taon. Pagsapit ng Oktubre 29, umabot na sa 4,834 ang naitalang kaso sa 47 estado, ayon sa Centers for Disease Control and Prevention (CDC).

Noong Oktubre, nagdeklara si Hochul ng disaster emergency sa New York kasunod ng mga outbreak sa estado at mga karatig-lugar.

Idineklarang eradicated ang tigdas sa United States noong 2000 matapos ang ilang taong matagumpay na kampanya sa pagbabakuna. Gayunman, muling dumarami ang kaso nitong mga nakaraang taon kasabay ng pagtaas ng pagdududa sa bakuna at kawalan ng tiwala sa mga awtoridad pangkalusugan.

Nagdudulot ang tigdas ng lagnat, sintomas sa paghinga at masakit na mga pantal sa balat. Sa malulubhang kaso, maaari itong humantong sa pulmonya at pamamaga ng utak na posibleng ikamatay.

Patuloy na kumikitil ng sampu-sampung libong buhay sa buong mundo ang sakit bawat taon. RNT/MDS

The post Bata sa NY, nasawi sa tigdas first appeared on Remate Online.

Dahil dito, umabot na sa 2,777 ang kabuuang kaso ng dengue sa lalawigan mula Enero hanggang Oktubre 2026, kabilang ang apat na nasawi. Saklaw ng pinakahuling datos ang morbidity weeks 1 hanggang 42, ayon sa PESU nitong Huwebes, Oktubre 29.

Pinakamaraming bagong kaso ang naitala sa Laoag City na may 17, kaya umabot na sa 400 ang kabuuang kaso nito ngayong taon.

Hinimok ng mga awtoridad pangkalusugan ang mga residente na patuloy na sundin ang mga hakbang upang maiwasan ang dengue at mapigilan ang pagkalat ng sakit na nakukuha sa kagat ng lamok.

Kabilang dito ang pag-aalis ng naipong tubig na maaaring pamugaran ng lamok, pagpapanatiling malinis ng kapaligiran at pag-iingat laban sa kagat ng lamok.

Binigyang-diin ng pamahalaang panlalawigan ang kahalagahan ng tuloy-tuloy na pagsasagawa ng mga hakbang na ito upang hindi na madagdagan ang mga kaso ng dengue. RNT/MDS

The post 65 bagong kaso ng dengue naitala sa Ilocos Norte first appeared on Remate Online.

Personal na sinalubong ni Manila Mayor Francisco “Isko Moreno” Domagoso si Health Secretary Dr. Edwin Mercado nitong Biyernes, Oktubre 30, sa Amadome Court sa Baseco para sa pagsisimula ng programa na layong protektahan ang mga residente laban sa influenza.

Target sa unang bugso ng pagbabakuna ang 200 senior citizens, habang nangako naman ang Department of Health (DOH) na magbibigay pa ng karagdagang bakuna na ipamamahagi sa iba’t ibang komunidad sa Maynila sa mga susunod na linggo.

Nagpasalamat si Domagoso sa pakikipagtulungan ng DOH at sinabing malaking tulong ang ahensiya sa pagsusulong ng mga programang pangkalusugan ng lungsod sa ilalim ng Minimum Basic Needs (MBN) program.

Kasabay nito, ipinagmalaki rin ng alkalde ang nalalapit na ganap na operasyon ng bagong Baseco Hospital matapos itong lagyan ng kumpletong laboratory, operating room at emergency room equipment.

Bahagi ito ng ₱324-milyong pondo ng lungsod para sa pagbili ng mga kagamitang medikal ngayong 2026.

Ayon kay Domagoso, halos 200 pasyente na ang araw-araw na pinagsisilbihan ng ospital na kumukuha ng mga kinakailangang gamot. Inaasahan naman nitong makukuha na ng pasilidad ang lisensiya para makapagbigay ng kumpletong serbisyong pang-ospital sa mga residente.

“Manawari naman sa huling sandali ng pamumuhay nila, maramdaman nila na mahal na mahal sila ng gobyerno ng Lungsod ng Maynila,” pahayag ni Domagoso, na binigyang-diin ang pangangalaga sa mga nakatatanda.

Sinabi naman ni Mercado na patunay ang programa ng pagtutulungan ng national at local government sa ilalim ng Universal Health Care (UHC) upang matiyak na maaabot ng serbisyong pangkalusugan ang bawat Pilipino.

Inihayag din ng kalihim na palalawakin ng DOH mula 75 tungo sa 135 ang listahan ng libreng gamot na maaaring makuha ng mga Manileño pagsapit ng susunod na taon. Kabilang dito ang insulin, thyroxine at mga gamot para sa family planning.

Tiniyak din ni Mercado na ligtas at epektibo ang flu vaccine. Posibleng magkaroon ng bahagyang pamamaga sa pinagbakunahang bahagi o panandaliang sintomas na kahawig ng trangkaso, ngunit karaniwang nawawala ang mga ito sa loob ng dalawang araw.

Ikinalugod naman ni Vice Mayor Angela Lei “Chi” Atienza ang programa dahil aniya, matagal na niyang nakikita ang pangangailangan ng mga residente sa Baseco para sa mas abot-kayang serbisyong pangkalusugan.

Samantala, iniulat ni OIC-City Health Officer Dr. Grace Padilla na sa 2,800 kaso ng sakit na naitala sa iba’t ibang pribado at pampublikong ospital, 87 ang kumpirmadong influenza.

Dahil dito, hinikayat niya ang mga senior citizen na samantalahin ang libreng bakuna na makukuha sa mga health center ng lungsod.

Iniulat din ni Padilla na nakatanggap kamakailan ng pitong parangal ang Manila Health Department dahil sa mahusay na pagpapatupad ng mga programang pangkalusugan, kabilang ang Universal Health Care at pamamahala sa mga barangay health worker.

Kabilang din sa mga kinilala ang Maynila bilang kauna-unahang local government unit na nakapagtala ng 100 porsiyentong licensing ng mga primary care facility.

Bukod sa senior citizens, bukas din ang libreng flu vaccination sa mga buntis, may mahihinang immune system, mga adultong may kasabay na karamdaman, health workers at frontline personnel. JAY Reyes/larawan kuha ni Eric Ocapan

The post Manila LGU, DOH, naglunsad ng libreng flu vacc para sa mga senior sa Baseco first appeared on Remate Online.

Bahagi ito ng mas malawak na pagtaas ng kaso ng dengue sa Agusan del Sur, na isinailalim sa province-wide outbreak noong Oktubre 1 matapos lumampas sa 2,700 ang mga kaso at umabot sa hindi bababa sa 18 ang nasawi.

Kabilang ang San Francisco sa mga lugar na may pinakamaraming kaso sa lalawigan, kasunod ng Rosario, Loreto at Bunawan. Ayon sa lokal na datos, lumampas sa epidemic threshold ang mga kaso noong huling bahagi ng ikalawang quarter at pinakamataas ang naitala sa pagitan ng morbidity weeks 36 at 38.

Pinakamaraming kaso ang naitala sa Barangay Lapinigan na may 58, kasunod ang Pasta na may 41. Sa poblacion, nakapagtala ang Barangay 5 ng 35 kaso, habang tig-30 naman sa Barangays 1 at 4.

Pinakamarami sa mga tinamaan ng sakit ang mga batang edad 10 hanggang 14, na may 84 kaso o 19.44 porsiyento ng kabuuang bilang. Halos magkapantay ang kaso sa babae at lalaki, na may 217 o 50.23 porsiyento sa babae at 215 o 49.77 porsiyento sa lalaki.

Kabilang pa sa mga barangay na may double-digit na kaso ang Pisa-an (26), Karaus (25), Alegria (25), San Isidro (24), Barangay 2 (22), Bayugan 2 (19), Barangay 3 (18), Hubang (14), Borbon (11) at Das-agan (10). Tig-iisang kaso naman ang naitala sa Ormaca at Bitan-agan.

Pinaigting ng mga health team ang misting operations, paglalagay ng larvicide at house-to-house inspections. Hinikayat din ang mga residente na sundin ang “5S” strategy ng Department of Health: hanapin at sirain ang mga pinamumugaran ng lamok, protektahan ang sarili laban sa kagat, agad magpakonsulta, suportahan ang fogging sa mga lugar na may mataas na kaso, at panatilihin ang sapat na pag-inom ng tubig. RNT/MDS

The post Kaso ng dengue sa bayan sa Agusan del Sur umabot na sa 432; 2 patay first appeared on Remate Online.