MANILA, Philippines – Binatikos ni Senador Panfilo “Ping” Lacson nitong Sabado, Hunyo 20, ang pahayag ni Senador Alan Peter Cayetano at sinabing malapit na itong bumigay.
“Kawawa naman. Kung anu-ano na sinasabi. Parang malapit nang bumigay. Sana hindi matuluyang mag meltdown,” ani Lacson.
“ASO? I WILL NEVER ADMIT THAT. Pero, siya – Kuya Ping ang tawag niya sa akin – matagal na… SELF-ADMISSION yata ang tawag dun,” dagdag pa niya.
Noong Biyernes ay tinawag kasi ni Cayetano si newly elected Senate President Pro Tempore Vicente “Tito” Sotto III at Senador Raffy Tulfo ng pagiging “lapdogs” ni Pangulong Ferdinand Marcos Jr.
Tinawag din niya si Senador Erwin Tulfo na “lapdog” ni Lacson.
“Sabi nila, sabi ni Raffy Tulfo, hindi daw sila Malacañang, in other words, hindi sila tuta,” sinabi ni Cayetano.
“But doon mo makikita yung graduated and experienced. Bakit? Kasi si Senator Tito Sotto and Raffy Tulfo, at least sila tuta ng Malacañang, pero si Erwin Tulfo, tuta lang ni Lacson,” dagdag pa ni Cayetano.
“Si Lacson? Hindi na po tuta si Lacson, aso na po siya. Matagal na.”
Ipinaliwanag niya na ang aso ay nangangahulugan ng sinuman na sunod-sunuran sa mga utos.
