MANILA, Philippines – Muling sinalag ni Senador Panfilo Lacson si Senate Minority Leader Alan Peter Cayetano laban sa paratang na pawang demolition job, witch hunting at trial by publicity sa ibinubulgar na anomalya sa Taguig projects.
Sa pahayag, sinabi ni Lacson na dahil sa dami at lakas ng mga nakalap na ebidensya hinggil sa “illegal” na reclamation at mga aktibidad sa imprastraktura sa Taguig City, napapa-“quake while quacking” na si Sen. Alan Peter Cayetano, ayon kay Sen. Panfilo “Ping” M. Lacson nitong Huwebes.
Sinabi ni Lacson na kahit magbintang si Cayetano nang magbintang na “politically motivated” ang imbestigasyon, nagsasalita na ang mga ebidensya at nasa Office of the Ombudsman na ang mga ito.
“Sen. Cayetano can accuse me all he wants of ‘politically motivated’ witch-hunt, fake news and trial by publicity, but I’m sure, he quakes in his shoes each time he sees every piece of evidence that I present each time he resorts to his trademark ‘quack-quack’ on Facebook Live,” aniya.
“PATHETIC. Imagine someone ‘quacking’ on FB Live with accusations of politically motivated demolition job, fake news and trial by publicity and at the same time ‘quaking in his boots’ every time each piece of evidence of corruption in his turf unfolds before his eyes,” dagdag niya sa post sa X.
Binanggit din ni Lacson na naipadala na niya at ng kanyang staff sa Ombudsman ang ilang ebidensyang nakalap nila sa ngayon hinggil sa illegal reclamation at mga infrastructure project sa Taguig City.
Nauna nang sinabi ni Lacson na maaaring nasayang ang hindi bababa sa P3.713 bilyong pondo ng bayan sa mga proyektong isinagawa sa mga bahagi ng Laguna Lake sa Taguig City na sumasailalim sa aksyon ng pamahalaan dahil sa “illegal” na reclamation.
Hindi pa kabilang dito, dagdag niya, ang iba pang maanomalyang slope protection at flood mitigation projects sa kahabaan ng Taguig River na sangkot sa double appropriations at mga “ghost” project.
“Marami na kaming naipadala, both testimonial and documentary – all sourced from official records of the Department of Public Works and Highways, Philippine Reclamation Authority, Land Registration Authority, General Appropriations Acts, etc. as advance copies of the pieces of evidence which will definitely help and guide the Ombudsman in issuing their ongoing fact-finding investigation, particularly in issuing subpoenas duces tecum and ad testificandum to the agencies and officials concerned,” aniya. Ernie Reyes
