MANILA, Philippines – Sinabi ni Akbayan Party‑list Rep. Perci Cendaña noong Linggo na hindi pa panahon para amyendahan ang Konstitusyon, at nagbabala na ang usapin ng Charter Change ay maaaring humantong sa mga hindi kaugnay na bagay kung bubuksan ito.
“Ang greatest fear natin, magamit ang pag‑amyenda sa Konstitusyon para sa mga anti‑people na amendment sa ating Konstitusyon,” aniya.
Lumabas ang pahayag ni Cendaña habang may ilang mambabatas na nagsuporta sa posibleng pagbabago ng umiiral na mga patakaran — at posibleng amiyendahan ang Konstitusyon — upang maiwasan umano ang tinatawag nilang judicial overreach matapos ideklara ng Supreme Court na unconstitutional ang mga articles of impeachment laban kay Vice President Sara Duterte.
Ipinaliwanag ni Cendaña na kapag sinimulan ang proseso ng Charter Change, hindi maaaring limitahan ito sa isang probisyon lamang at maaaring magbigay daan sa iba pang interesadong baguhin ang Konstitusyon.
Sinabi rin ni Senator JV Ejercito na ang anumang hakbang para sa Charter Change ay dapat pag‑aralang mabuti bago buksan muli, lalo na ang mga economic provisions, dahil maaaring may malaking epekto ito at maraming ibang bagay ang lumabas sa pagtalakay. RNT/MND
