MANILA, Philippines- Hinamon ng Philippine Coast Guard nitong weekend ang China Coast Guard vessel 76 nautical miles mula sa baybayin ng Palauig Point sa Zambales, na nasa Philippine Exclusive Economic Zone (EEZ).
Sa kanyang X account post noong Linggo ng gabi, sinabi ni PCG spokesperson Commodore Jay Tarriela na inatasan ng ahensya ang Multi Role Response Vessel (MRRV-4409) BRP Cabra noong Sabado ng gabi na i-challenge ang CCG vessel, alinsunod sa United Nations Convention on the Law of the Sea (UNCLOS).
Ngunit patuloy na binabalewala ng China ang desisyon ng Permanent Court of Arbitration noong 2016 na nagpapawalang-bisa sa nine-dash line nito.
Naghain na ang Pilipinas ng mahigit 150 diplomatic protests laban sa China hinggil sa agawan sa teritoryo sa ilalim ng administrasyon ni Pangulong Ferdinand “Bongbong” Marcos Jr.
Samantala, sinabi ni Tarriela na nakatanggap din ang BRP Cabra ng distress call mula sa Filipino fishing boat FFB John John na iniulat na nasiraan ng makina sa layong 40.35 nautical miles southeast ng Bajo De Masinloc. Jocelyn Tabangcura-Domenden
