MANILA, Philippines – Arestado ang isang Chinese national sa Makati City dahil sa umano’y pang-iismagel ng mga luxury vehicle at pagkakaroon ng pekeng driver’s license, ayon sa Land Transportation Office (LTO).
Sa pulong balitaan, sinabi ni LTO Chairperson Assistant Secretary Markus Lacanilao na ang dating empleyado ng naturang Chinese national ay humingi ng tulong kay Senador Erwin Tulfo para isumbong ang smuggling activities ng amo.
Ani Lacanilao, nakakuha sila ng impormasyon sa tulong ng staff ni Tulfo dahilan para maaresto ang suspek noong Huwebes, Nobyembre 27.
“Based on the information we received, they smuggle luxury vehicles. This is an organized group. They remove plates from other cars to avoid being recognized,” pahayag ni Lacanilao.
Sinita ng mga awtoridad ang isang Mercedes-Benz S500 matapos makita ang suspek sa Makati City.
“When the car was flagged down, it had violations. The car’s color does not match the one on the records. The individual was carrying firearms without proper documents,” dagdag ni Lacanilao.
Nabahala rin ang opisyal sa paggamit nito ng pekeng driver’s license at pekeng pagkakakilanlan.
Inihain na ang ilang kaso laban sa suspek kabilang ang illegal possession of firearms at bigong pagpaparehistro ng vehicle colors.
Kasalukuyang nasa kustodiya ng Philippine National Police sa Camp Crame sa Quezon City ang suspek habang inimpound naman ang luxury car sa LTO Central Office compound. RNT/JGC
