MANILA, Philippines – Sinabi ni Armed Forces of the Philippines (AFP) chief of staff General Romeo Brawner Jr. nitong Linggo na matagumpay na naitaboy ng mga tropang Pilipino na nakatalaga sa BRP Sierra Madre ang mga sasakyang pandagat ng China na pumasok sa Ayungin Shoal.
Idinagdag ni Brawner na inalis ng mga sundalo ang mga lambat na inilagay ng Chinese maritime militia sa loob ng bahura.
“The situation is improving. Yes, nandun pa rin sila sa paligid ng Ayungin Shoal… pero malayo naman. We were successful in pushing them outward,” ani Brawner. “Nag-lay sila ng fishing nets… Ang utos ng Western Command commander was for our troops to cut the fishing nets so that mobility would still be allowed within the shoal.”
Binigyang-diin ni AFP Western Command chief Vice Admiral Alfonso Torres Jr. na nananatiling alerto ang militar sa anumang posibleng mangyari.
“We are always on alert. We don’t have to be on extra alert. We are always on alert,” aniya.
Ayon kay Brawner, magsasagawa ang AFP ng panibagong rotation at resupply mission sa BRP Sierra Madre “one of these days.”
Umaasa ang militar na patuloy na igagalang ng Beijing ang pansamantalang pagkakaunawaan nito sa Maynila sa pagsasagawa ng mga resupply mission sa shoal.
“Pareho pa rin ang preparations natin for the resupply mission because we believe that the agreement set by the DFA [Department of Foreign Affairs] and their Chinese counterpart still stands, kaya we are optimistic na pagdating sa time na magreresupply tayo, rerespetuhin nila ang ating resupply mission,” sabi ni Brawner.
“It is our right to do the resupply mission dahil karapatan nating suportahan ang ating mga tropa sa BRP Sierra Madre,” dagdag niya. RNT/MND
