MANILA, Philippines- Nagpahayag ng labis na pagkabahala ang Commission on Human Rights (CHR) hinggil sa umano’y “misreporting” na ginagawa sa police blotters sa Davao City, isang pagtatangka para pagtakpan ang tunay na crime statistics.
Sa isang kalatas, tinukoy ng CHR ang report ukol sa “discrepancies” sa dalawang police log books na nagpapakita ng magkaibang entry reports. Ang isa ay naglalaman ng “lesser records at wrong classification” ng kaso na nagresulta ng reassignment ng 19 police station commanders sa Davao City.
Sinabi ng CHR na ni-require ng Philippine National Police (PNP) Operations Manual ang bawat PNP operating unit/station na panatilihin ang dalawang hiwalay na police blotters– isang kulay asul (blue) at isang kulay rosas (pink) na blotter.
Ang blue blotter ay dapat na naglalaman ng daily registry ng lahat ng crime incident reports kabilang na ang opisyal na summaries of arrest, at iba pang mahalagang kaganapan o insidente na iniuulat habang ang pink blotter ay dapat na naglalaman ng mga reported cases na may kinalaman naman sa Violence Against Women and Children, Trafficking in Person, at iba pang Gender-Based violence.
Bilang public document, sinabi ng CHR na ang police blotter ay dapat na bukas sa lehitimong miyembro ng media at dapat ay hindi nito makokompromiso ang national security at public safety, sinabi ng CHR na dapat na sanayin ng PNP ang “transparency at accountability” sa pagbibigay ng impormasyon sa publiko.
Gayundin, sinabi ng CHR na sa ilalim ng PNP Standard Operating Procedure in Recording Incident Reports, sa police blotter, kailangang tiyakin ng isang pulis na “all the information gathered is truthful and exact in its documentation.”
“The fact that there have been reported discrepancies in the Davao City police blotter is a matter of great concern,” ayon sa CHR.
“Manipulating crime statistics obscures the true extent of criminal activity, and in turn, prevents victims from obtaining justice as their cases may be downplayed or ignored,” dagdag nito.
“The Commission emphasizes that maintaining the accuracy and integrity of crime reporting is essential for maintaining justice and public confidence. Accurate crime statistics ensure that the State remains accountable to the people.”
Pinaalalahanan naman ng CHR ang gobyerno at ang law enforcement authorities ng kanilang obligasyon na panatilihin ang “highest standards” ng “integrity at accountability.”
Binigyang-diin nito na habang kinilala ang hangarin ng law enforcement sector na mas pababain ang crime rate sa bansa, hindi dapat ito gamitin bilang dahilan para gumawa ng “misrepresentation” sa status quo ng komunidad.
“After all, these reported numbers are not just mere statistics, these are actual stories, grievances, and transgressions of Filipinos that must be addressed by the authorities within the bounds of their mandate,” ang sinabi ng CHR. Kris Jose
