MANILA, Philippines – Maaaring maapektuhan ang paghahanda para sa 2028 presidential elections kung hindi agad maipasa ang panukalang Anti-Political Dynasty law, ayon sa babala ng Commission on Elections (Comelec) noong Martes.
Sinabi ni Comelec Chairperson George Erwin Garcia sa pagdinig ng House Committee on Suffrage and Electoral Reforms na may natitirang isa’t kalahating taon na lang bago ang filing ng certificates of candidacy (COCs) para sa 2028 national elections.
Ayon kay Garcia, ang limitadong panahon ay maaaring magdulot ng hamon sa pagpapatupad ng batas, lalo na sa pagsasagawa ng voter education bago ang mahalagang halalan.
Sinimulan na ng komite ang mga pagdinig sa panukalang anti-political dynasty bills, kung saan may 19 na panukala ang nakatakdang talakayin.
Gayunpaman, ang bill na isinampa ni Marikina City Representative Romero Quimbo ay hindi naisama sa diskusyon.
Sinabi rin ni Garcia na inaasahan nilang maipasa ang Anti-Political Dynasty law bago ang Hulyo 2027. Sa kasalukuyan, nakatakda ang filing ng COCs para sa halalan sa Oktubre 2027.
Kumpiyansa ang Comelec na maipapasa ang batas sa tamang oras dahil sinimulan na ng mga mambabatas ang deliberasyon at ginawa itong prayoridad ni Pangulong Ferdinand Marcos Jr.
Binanggit ni Garcia na ang batas ay dapat “maikli, malawak, at tiyak” upang maiwasan ang masyadong malawak na interpretasyon ng Comelec. Jocelyn Tabangcura-Domenden
