MANILA, Philippines – Pinaalalahanan ng Commission on Elections (Comelec) ang mga kandidato na tanggalin ang kanilang campaign materials na ipinaskil para sa Barangay and Sangguniang Kabataan Elections (BSKE) at maghain ng kanilang statement of contributions and expenditures (SOCE).
Sinabi ni Comelec Chairman George Garcia na dapat tanggalin na ang mga posters at iba pang campaign materials sa loob ng limang araw mula Election day o sa Nobyembre 4.
Binigyang-diin ni Garcia na hindi nila maaaring tanggalin ang mga campaign materials na naka-post sa mga pribadong pag-aari, kasunod ng desisyon ng Korte Suprema kamakailan.
Ayon kay Comelec spokesperson Rex Laudiangco, ang hindi pag-alis ng campaign materials ay maaaring hindi makaapekto sa kanilang termino sa panunungkulan ngunit may implikasyon ito kung nilabag nila ang mga resolusyon ng poll body.
Pinaalalahanan din ng Comelec ang mga kandidato na maghain ng kanilang SOCE sa Nobyembre 29 deadline.
Sa ilalim ng Republic Act 7166 o ang Synchronized National and Local Elections and Electoral Reforms Act, walang halal na opisyal ang maaaring manungkulan nang hindi naghain ng kanilang SOCE
Ang mga first time offenders ay hihilingin na magbayad ng multa mula ₱1,000 hanggang ₱30,000 sa loob ng 30 araw mula sa pagtanggap ng paunawa.
Ang mga hindi makapagsumite ng kanilang SOCE pagkatapos ng dalawang susunod na halalan ay hindi na papayagang tumakbo para sa pampublikong opisina at dapat magbayad ng multa mula ₱2,000 hanggang ₱60,000.
Nauna nang sinabi ng Department of the Interior and Local Government na hindi na mangangailangan ang mga nanalong kandidato na magsumite ng kanilang SOCE sa ahensya bago sila maupo sa kanilang mga puwesto. (Jocelyn Tabangcura-Domenden)
