MANILA, Philippines – Itinalaga ni Pangulong Ferdinand Marcos Jr. si dating executive secretary Oscar Orbos bilang acting chairperson at miyembro ng Board of Directors ng state-run broadcaster People’s Television Network, Inc. (PTNI).
Sinabi ng Presidential Communications Office (PCO) nitong Huwebes, Oktubre 3 na irerepresenta ni Orbos ang pribadong sector.
Nanumpa si Orbos sa harap ni Executive Secretary Lucas Bersamin.
Nagsilbing executive secretary at transportation and communications secretary si Orbos sa administrasyon ni dating Pangulong Corazon Aquino mula 1990 hanggang 1991.
Siya rin ay naging congressman ng first district ng Pangasinan mula 1987 hanggang 1990, at gobernador mula 1995 hanggang 1998.
Bukod dito, itinalaga rin ni Marcos ang political analyst na si Antonio Contreras bilang acting vice chairperson at miyembro ng PTNI Board of Directors, na magrerepresenta sa educational sector; dating PTNI general manager Katherine Chloe de Castro bilang director general ng Philippine Information Agency (PIA); at Francis Carlo Taparan bilang Director IV ng National Printing Office (NPO). RNT/JGC
