DAVAO CITY- Hindi tumalima si Davao del Norte Gov. Edwin Jubahib sa 60-day preventive suspension order na inilabas ng Office of the President noong Abril 8 subalit isinilbi nitong Huwebes, Abril 11.
Sa video statement nitong Huwebes, binigyang-diin ni Jubahib na hindi siya bababa sa pwesto dahil labag umano ang suspension order sa kanyang right to due process.
“The preventive suspension is unjust since I was not invited to face any trial or even before the Office of the President,” pahayag ng gobernador.
Nag-ugat ang suspension order sa reklamong inihain ni Davao del Norte 2nd District Provincial Board Member Orly Amit para sa grave abuse of authority and oppression noong 2022.
Ani Jubahib, hindi malinaw sa kanya ang ang basehan para sa suspensyon.
Aniya, hindi nagsagawa ang Department of Interior and Local Government ng anumang imbestigasyon sa reklamong isinampa laban sa kanya.
“They just issued the preventive suspension from OP. Thus, it was a very clear act of injustice because it did not undergo a proper due process.”
Inihayag ni Jubahib na hindi niya papayagang umiral sa probinsya ang anumang personal na interes ng kanyang mga kalaban sa politika.
Hinikayat ng gobernador ang kanyang mga taga-suporta na magtipin sa provincial capitol grounds sa Tagum City upang tutulan ang kautusan. “Let us fight this injustice, harassment, and power tripping,” giit ni Jubahib.
Daan-daang taga-suporta ang humarang sa mga gate ng provincial capitol grounds nitong Huwebes ng umaga.
Ipinost naman ng DILG ang kopya ng kautusan sa gate dahil hindi sila makapasok sa kapitolyo.
Sa suspensyon ni Jubahib, sinabi nig DILG-11 Regional Director Abdullah Matalam na si Vice Gov. De Carlo Uy ang magsisilbing gobernador sa loob ng 60 araw. RNT/SA
