MANILA, Philippines – Isang province-wide dengue outbreak ang ikinasa sa Iloilo dahil sa tumataas na kaso ng dengue hemorrhagic fever sa 36 sa 43 local government units (LGUs) ng Iloilo.
Ayon sa Iloilo Provincial Health Office (IPHO), naabot na ng 36 LGUs ang epidemic threshold.
Batay sa datos ng Department of Health 6, umabot na sa 10,188 ang kaso ng dengue sa Western Visayas noong 2024 kung saan 23 ang namatay. Ang Lalawigan ng Iloilo ang may pinakamaraming kaso na nasa 3,914.
Kaugnay ng outbreak, nagpulong ang mga health officer ng mga kinauukulang LGU sa isang cluster meeting para suriin ang mga hakbang sa mga tugon at pamamahala.
Ayon kay Dr. Ma. Socorro Quiñon, provincial health officer ng Iloilo, kabilang sa mga hamon ang pagkaubos ng supply ng test kits sa mga LGU at adulticide sa IPHO.
Hinihintay ng Pamahalaang Panlalawigan ng Iloilo ang deklarasyon ng dalawa o higit pang LGU ng state of calamity (SoC) para makapagdeklara ng province-wide SoC.
Sa oras ng pag-post, ang Passi City ang tanging LGU na nagdeklara ng state of calamity.
Sinabi ni Iloilo Governor Arthur Defensor Jr. na sa kabila ng outbreak, tiniyak niya ang sapat na supply ng dengue test kits at intravenous fluids, gayundin ang bed capacity sa mga ospital.
Kapag naideklara na ang state of calamity sa buong probinsya, ang mga hakbang laban sa dengue ay susundin sa mas malawak na saklaw at ang quick response fund ay gagamitin upang harapin ang outbreak. RNT
