MANILA, Philippines- Sa paghahanda nito sa pagbubukas ng bagong school year sa susunod na linggo, pinaalalahanan ng Department of Education (DepEd) ang local government units (LGUs) nitong Huwebes na tiyakin na ang paggamit ng mga paaralan bilang evacuation facilities ay “as brief as possible” upang maiwasan ang pagkaantala ng pagkatuto.
Ipinalabas ni Education Secretary Sonny Angara ang DepEd Memorandum No. 004, s. 2024, kung saan nakasaad ang preparedness at response measures para sa pinagsamang epekto ng southwest monsoon at Super Typhoon Carina.
Ipinalabas ang memorandum sa kaukulang regional directors, schools division superintendents, at division Disaster Risk Reduction Management (DRRM) coordinators sa Regions I, II, III, IV-A, IV-B, V, VI, VIII, Cordillera Administrative Region (CAR), at sa National Capital Region (NCR), na labis na apektado ng pagbaha dahil sa monsoon rains na pinalakas pa ni “Carina.”
Hanggang nitong Hulyo 24, 21 paaralan sa NCR at CALABARZON ang ginagamit bilang evacuation centers.
Sa paggamit ng mga eskwelahan bilang evacuation facilities, binigyang-diin ni Angara sa memorandum na ang gymnasiums, learning at activity centers, auditoriums, at iba pang open spaces “shall be utilized first.”
“Classrooms shall only be used as a last resort,” ayon sa memo. “The use of school premises shall be as brief as possible (not more than 15 days).”
Gayundin, pinaalalahanan ng DepEd ang school heads na sakaling hilingin ng LGU na gamitin ang mga paaralan bilang evacuation centers, dapat magkasa ng Memorandum of Agreement (MOA) sa pagitan ng LGU at ng paaralan. Dapat nakasaad sa MOA ang mga papel at responsibilidad ng LGU, eskwelahan, at mga miyembro ng komunidad.
“LGUs should facilitate general cleaning, fumigation, payment of utilities, and repair of schools used as evacuation centers,” anang DepEd. RNT/SA
