MANILA, Philippines- Hiniling ng Department of Education sa mga pampublikong paaralan na isagawa ang kanilang End-of-School-Year (EOSY) activities, na nakatakda ngayong buwan, sa indoor venues sa patuloy na pagharap sa dangerous levels ng init sa gitna ng El Niño.
Sa ilalim ng Memorandum 23-2024 na ipinalabas ng DepEd noong May 2, nakatakdang isagawa ang EOSY rites mula May 29 hanggang 31, 2024, at iminungkahing ikasa sa indoor venues o well-ventilated areas na malayo sa init ng araw.
“To ensure the safety and protection of learners, teachers, and attendees, schools are advised to hold their EOSY Rites in indoor venues with proper ventilation or covered courts to avoid exposure to the extreme heat of the sun,” saad sa memorandum.
“Schools shall avoid scheduling their EOSY Rites during the time of the day when temperatures are at the highest,” dagdag pa rito.
Patuloy na nakararanas ang bansa ng matinding init.
Iniulat ng Department of Health (DOH) ang 77 kaso ng heat-related illnesses mula January 1 hanggang April 29 ng kasalukuyang taon, kung saan pito ang naiulat na nasawi subalit “non-conclusive” para sa heat stroke dahil sa kakulangan ng datos.
Ayon kay DepEd spokesperson Michael Poa, hindi tinutukoy sa memorandum ang oras ng pagsasagawa ng EOSY rites dahil binibigyan ang mga paaralan ng “flexibility” na itakda ang mga aktibidad sa mga oras na hindi gaanong mainit ang panahon.
“Kung talagang hindi natin maiwasan na walang indoor venues na magagamit or covered courts ay gawin lang sa mga oras na hindi matindi ang sikat ng araw at hindi matindi ‘yung init,” anang opisyal.
“We intentionally did not prescribe a time kasi iba-iba ang sitwasyon sa ating mga schools nationwide, and that is why nakausap naman ang ating mga school heads, we’re giving them flexibility,” dagdag niya.
Nakasaad din sa nasabing memorandum na dapat kaltasin ang gastos para sa EOSY rites sa maintenance and other operating expenses (MOOE) ng mga pampublikong paaralan.
“No DepEd personnel shall be allowed to collect any kind of contribution or fee for the Graduation/Moving-Up Ceremony,” anito.
“Dapat, unang-una, no collection tayo sa graduation. Siguraduhin na walang mga teachers, staff, school personnel, or sinuman na magkakaroon ng any collection… We want it to be very simple lang and meaningful,” sabi ni Poa. RNT/SA
