MANILA, Philippines – Kinatigan ni Senador Risa Hontiveros ang aplikasyon ng US government para sa deportasyon ni Pastor Apollo Quiboloy na nahaharap sa ilang kaso tulad ng sex trafficking of minors, fraud at bulk cash smuggling.
Sa pahayag, sinabi ni Hontiveros na napapanahon ang deportasyon ni Quiboloy, founder ng Kingdom of Jesus Christ, upang mabigyan ng katarungan ang mga krimen nito sa kababaihan, kabilang ang human trafficking.
“It’s about time for Apollo Quiboloy to be extradited to the United States of America,” ayon kay Hontiveros.
Aniya, ipinuslit ni Quiboloy ang ilang kababaihan at batang babae mula sa iba’t ibang panig ng mundo kaya kailangang mabigyan ng katarungan upang mapanagot siya sa mga krimen kung saan niya ito ginawa.
“As Chairperson of the Senate Committee on Women, Children, Family Relations and Gender Equality, which heard the heartbreaking testimonies of the women Quiboloy preyed upon, I am relieved that not one but two jurisdictions want to hold him to account for his crimes against women and girls,” ani Hontiveros.
“Wala na siyang dapat matirang kahit katiting na impluwensya dito sa Pilipinas. His continued presence in this country still emboldens his followers to harass the very survivors who found the courage to speak against him,” paliwanag ng senadora.
Iginiit pa ni Hontiveros na dapat kumilos kaagad ang Department of Justice (DOJ) upang mahawan ang landas tungo sa extradition.
“Panahon na para papanatagin ang buhay ng mga biktima,” ani Hontiveros.
Pormal na hiniling ng United States Department of State ang extradition ni Quiboloy, ayon sa mataas na opisyal ng pamahalaan nitong Huwebes.
Sa text message, sinabi ni Philippine Ambassador to the US Jose Manuel Romualdez na gusto ng US na kaagad ipadala si Quiboloy sa lalong madaling panahon.
“The formal request was transmitted to the Department of Justice. (It was transmitted by the) US State Department… they want Quiboloy asap due to numerous cases in the US,” aniya sa media.
Sinabi pa ng envoy na depende sa DOJ kung ipapatapon si Quiboloy dahil may nakabinbin na kaso sa Pilipinas.
Pinagbasehan ng extradition ang hatol noong 2021 sa California na napatunayang sangkot si Quiboloy sa kasong sex trafficking of minors, fraud at bulk cash smuggling.
Nilagdaan ng Pilipinas ang isang extradition treaty sa United States noong November 1994.
“Under Article 11, it allows the requested state to ‘temporarily surrender’ the person in question if he/she is ‘being prosecuted or is serving a sentence’ in the country,” ayon sa tratado.
