MANILA, Philippines – Iginiit ng Department of Foreign Affairs (DFA) nitong Biyernes na ang karapatang pandagat ng Pilipinas ay nagmumula sa soberanya nito sa teritoryo at hindi nakabatay kung sakop ba ng exclusive economic zone (EEZ) ng alinmang bansa ang mga naturang lugar.
“In connection with certain misconceptions in the public sphere, the DFA clarifies that maritime entitlements arise from territory, and that sovereignty over high-tide features is not contingent on whether or not they fall within the maritime zones of other landmasses,” sinabi ni DFA Deputy Assistant Secretary at tagapagsalita sa maritime issues na si Rogelio Villanueva sa isang press briefing.
Binigyang-diin ni Villanueva na matagal nang naitatag ang soberanya ng Pilipinas sa Kalayaan Island Group (KIG) at sa territorial sea ng mga high-tide feature nito.
“The extent of what constitutes the West Philippine Sea, as well as our sovereignty over the Kalayaan Island Group and the territorial sea of its high-tide features, are already explicitly established and are not contingent on whether or not they fall within the country’s exclusive economic zone,” aniya.
Ang pahayag ng DFA ay kasunod ng komento ni Senador Rodante Marcoleta na dapat umanong isuko ng Pilipinas ang KIG dahil wala ito sa EEZ ng bansa, na umani ng batikos mula sa mga eksperto at opisyal. Kalaunan, sinabi ng senador na “abbreviated” ang kanyang naging pahayag.
Batay sa Republic Act 12064, sinabi ni Villanueva na malinaw na tinukoy ang maritime zones ng Pilipinas at naaayon ito sa United Nations Convention on the Law of the Sea (UNCLOS).
“We should keep in mind that the Philippine maritime zones under RA 12064—which is consistent with UNCLOS—set forth that the maritime zones of the Philippines on the western side of the Philippine archipelago… shall be collectively called the West Philippine Sea,” ani Villanueva.
Binanggit din niya na kabilang sa mga high-tide feature malapit sa Pag-asa Island ang Sandy Cay 1, Sandy Cay 2, at Sandy Cay 3, na inaangkin ng China.
Muling iginiit ng DFA ang posisyon ng Pilipinas sa ilalim ng UNCLOS at ng 2016 arbitral ruling na nagbasura sa nine-dash line claim ng China.
“I would also like to take this opportunity to emphasize that our sovereignty over the Philippine archipelago and other territories… remains absolute,” ani Villanueva.
Sa parehong briefing, itinanggi rin niya ang mga kumakalat na alegasyon na “leaked” ang liham ni Foreign Affairs Secretary Maria Teresa Lazaro kay Senator Risa Hontiveros.
“There were those who wrongly thought that the letter… was ‘leaked,’ when in fact the Secretary gave the permission… to release it to the public,” aniya.
Pinuna rin ni Villanueva ang tinawag niyang “performative rhetoric” sa pampublikong diskurso.
“While performative rhetoric is a reality in modern public discourse, the DFA has long resolved to conduct our work with the national interest as the sole consideration,” aniya.
Dagdag niya, magpapatuloy ang Pilipinas sa paghahain ng diplomatic protests kung kinakailangan, pananatiling bukas ang komunikasyon sa China, at pagtutulungan para makumpleto ang Code of Conduct sa South China Sea sa loob ng taon.
Patuloy na inaangkin ng China ang halos 90 porsiyento ng South China Sea, kabilang ang mga bahaging sumasaklaw sa teritoryo ng Pilipinas at iba pang bansa. Mayroon ding magkakapatong na claim ang ilang bansa sa rehiyon. Dave Baluyot
