HINIKAYAT ni incoming Department of Education (DepEd) Secretary, Senator Juan Edgardo “Sonny” Angara, ang ahensiya ng gobyerno at mga kompanya na mag-hire ng Senior High School (SHS) graduates sa trabaho na nangangailangan ng simpleng gawain.
Sinabi ni Angara na karamihan kasi sa job qualifications sa bansa ay nananatiling kailangan na makakompleto ng college degrees, dahilan para ang pangako na K to 12 employability ay hindi maisakatuparan.
“Sa ngayon, hindi totoo iyan, hindi nangyayari iyan,” ayon kay Angara, tinukoy ang pangako na K to 12 employability.
“Hindi lang naman mga eskwelahan ang may kasalanan diyan. Iyong mga employers, o ahensya mismo, lagi nila nilalagay na college graduate. Kung simple lang naman ang mga gawin, bakit college graduates?”aniya pa rin.
“Gusto nating i-convince ang ating mga employers, even starting with the government agencies, iyong mga lower-level jobs po, dapat ay K to 12 graduates in certain competencies or certain skills na tinuro sa kanya, dapat sapat na po iyon,” ani Angara.
Sinabi pa niya na hihintayin niya ang resulta ng nagpapatuloy na K to 12 curriculum review para matukoy kung kailangan pa ang rebisyon at tugunan ang “skills mismatch at employability challenges.”
Samantala, sinabi naman ni DepEd spokesperson Michael Poa na sa oras na maisabatas na ang Senate Bill 2367 o Batang Magaling Act, naglalayong i- revise ang eligibility requirements para sa government employment para ikonsidera ang SHS graduates, makatutulong ito na mapalakas ang kanilang employability, ang ahensiya ng gobyerno ang magbibigay halimbawa ng applicable qualification standards.
Nanawagan din si Angara para sa isang holistic approach pagdating sa pagpapahusay sa sistema ng edukasyon, kabilang na ang mas maraming flexible option, gaya ng ladderized education.
“Iyong pwedeng mag-aral habang nagta-trabaho. So, eventually, makukuha niya iyong kanyang diploma, maaaring hindi lang apat na taon. Mayroon tayong mas simpleng degree sana. Pero hindi na ho sakop ng Department of Education iyan, sakop po iyan ng CHED (Commission on Higher Education) o TESDA (Technical Education and Skills Development Authority). Pero dapat ganun po ang galaw ng gobyerno,” ang litaniya ni Angara.
Samantala, nakipag-partner naman ang CHED, TESDA, at Department of Labor and Employment sa DepEd na magbigay ng free assessments para sa sertipikasyon sa SHS – Technical Vocational Livelihood (SHS-TVL) Track graduates noong Mayo para tulungan ang mga SHS graduates na maging mas ’employable.’
Sa ilalim ng dalawang joint memorandum circulars, popondohan ng mga nabanggit na ahensiya ng gobyerno ang ‘assessment for National Certificate I and II’ ng mga gradweyt at maging ang pag-embed sa Technical and Vocational Education and Training (TVET) sa lahat ng SHS tracks. Kris Jose
