MANILA, Philippines – Kinuwestiyon ni House justice committee chairperson Gerville Luistro ang hindi tugmang pahagay ni Vice President Sara Duterte na handa niyang harapin ang mga akusasyon sa impeachment cases.
Ito ay dahil sa hindi pagdalo ng Bise Presidente sa unang araw ng impeachment proceedings sa Kamara.
“She is, apparently, ready to face the accusations… And yet, it appears she will not even participate,” aniya.
Binanggit din niya ang sinabi ni Justice Noel Tijam sa impeachment ni Chief Justice Maria Lourdes Sereno na ang hindi pagdalo sa hearings ay maaaring ituring na “culpable violation of the Constitution.”
“Ang tanong ngayon: maaari rin ba nating sabihin ito sa Bise Presidente?” dagdag niya.
Kabilang sa mga alegasyon laban kay Duterte ang betrayal of public trust at culpable violation of the Constitution dahil sa pagbabanta umano sa Pangulo at kanyang pamilya; sa umano’y maling paggamit ng P612.5M confidential funds; sa hindi pagdeklara ng assets; at sa abuse of power at bribery.
Iginiit ni Luistro na lahat ng opisyal, kabilang ang Bise Presidente, ay nanumpa na sundin at ipagtanggol ang Konstitusyon.
“Para sa lahat ng opisyal… tinutupad ba natin ito? Pinapanindigan ba natin ito,” aniya.
Tiniyak din niya na itutuloy ng komite ang proseso kahit wala ang VP.
“So regardless of the participation of the Vice President… this committee will proceed… without hesitation, and without delay,” sabi niya.
Samantala, sinabi ni Duterte na mas pipiliin niyang tumulong sa mga apektado ng mataas na presyo ng petrolyo kaysa dumalo sa hearing, na aniya’y “third fishing expedition” laban sa kanya.
Iginiit niyang walang sapat na ebidensya laban sa kanya at dapat ibasura ang mga reklamo. RNT/MND
