MANILA, Philippines – Kinumpirma ng Department of Information and Communications Technology (DICT) na 19 government websites ang na-hack noong Setyembre 21, ngunit walang ebidensya ng data breach.
Ayon kay DICT Secretary Henry Aguda, apat na national agencies ang naapektuhan — Anti-Red Tape Authority, Bureau of Customs, DICT, at Department of Economy, Planning and Development — ngunit training modules at complaint platforms lang ang na-kompromiso at agad na naayos.
Tiniyak niya na hindi naapektuhan ang eGov PH app at nananatiling ligtas at naka-encrypt ang personal na impormasyon alinsunod sa Data Privacy Act.
Kasama rin sa insidente ang DDoS attacks at mahigit 1.4 milyong bigong breach attempts. Pinaghihinalaang sangkot ang hacktivist group na AnonymousPH, bagama’t itinanggi nila ito. May sinusundan ding person of interest na nasa bansa, ayon sa DICT. RNT
