MANILA, Philippines- Nanumbalik na ang kabuuang walong sistema ng state-run Philippine Health Insurance (PhilHealth) Corporation, subalit hawak pa rin ng hackers ang hindi matukoy na dami ng datos, ayon sa Department of Information and Communications Technology (DICT) nitong Miyerkules.
Sinimulan ng hackers na ilantad ang ilang personal information ng PhilHealth employees sa dark web nitong Martes matapos hindi magbayad ng gobyerno ng $300,000 (halos ₱17 milyon) na ransom money.
Sinabi ni DICT Undersecretary Jeffrey Dy na hindi pa makumpirma kung gaano kalaki ang impormasyong hawak ng hackers.
“Right now, the full data which is being held by the hackers has not yet been published. I don’t know why. Maybe they are still hoping that we will pay them,” ani Dy. “They are slowly publishing information and it is true that most of the information we saw are from employees of PhilHealth.”
Aniya, inilalantad ng hackers ang personal na impormasyon katulad ng identification cards, payrolls, mga larawan at ilang ATM cards ng PhilHealth employees.
Bagama’t inamin niya na ilang workstations na ginagamit ng PhilHealth employees ang nakompromiso, nilinaw ng undersecretary na “intact” pa rin ang membership database ng PhilHealth, at hindi naapektuhan ng Medusa ransomware attack.
Inihayag din ni Israel Francis Pargas, PhilHealth senior vice president for health finance policy, na ligtas ang member o patient data, dahil ang nakuha lamang ng hackers ay employee information at ilang research papers. RNT/SA
