Si dating Pangulong Rodrigo Duterte ay nakakulong na ngayon sa Scheveningen Prison sa The Hague, Netherlands, habang hinihintay ang kanyang paglilitis sa International Criminal Court (ICC) kaugnay ng umano’y mga krimen laban sa sangkatauhan na may kaugnayan sa kanyang kampanya kontra droga.
Dumating si Duterte sa Netherlands mula Dubai at inilipat sa kulungan noong gabi ng Marso 12.
Nagtipon ang kanyang mga tagasuporta sa labas ng kulungan at sumigaw ng kanilang pagsuporta.
Naglabas ang ICC ng warrant of arrest laban kay Duterte, na inakusahan ng paglikha at pag-armas sa mga death squad na sangkot sa pagpatay ng mga hinihinalang gumagamit at nagbebenta ng droga. Inaasahang haharap siya sa ICC judge sa mga susunod na araw para sa paunang pagdinig.
Lumipad patungong Netherlands si Pangalawang Pangulong Sara Duterte upang makipagkita sa kanyang ama at sa kanyang legal na koponan. Nagbigay naman ng tulong ang Embahada ng Pilipinas sa The Hague, kabilang ang pagbibigay ng damit at care packages.
Pagkatapos ng pagkakakulong ni Duterte, magsasagawa ang Pre-Trial Chamber ng pagdinig para kumpirmahin ang kanyang pagkakakilanlan, tiyakin na nauunawaan niya ang mga paratang, at itakda ang petsa para sa confirmation of charges hearing na magpapasya kung itutuloy ang kaso sa paglilitis.
Gaganapin ang paglilitis, kung itutuloy, sa The Hague. RNT
