MANILA, Philippines – Inanunsyo ng Department of Health (DOH) nitong Martes, Abril 16, na nakapagtala ito ng kabuuang 1,477 kaso ng pertussis sa buong bansa mula Enero 1 hanggang Abril 6, na nagresulta sa 63 na nasawi.
Sa isang pahayag, binanggit ng DOH na ang mga kasong ito ay patuloy na tumataas.
Sa kabila nito, tiniyak ng DOH sa publiko ang patuloy nitong outbreak response immunization efforts, na inaasahang darating ang tatlong milyong pentavalent o 5-in-1 vaccine doses sa Hunyo o mas maaga.
Binigyang-diin ni Health Secretary Teodoro Herbosa ang kahalagahan ng pagpapabuti ng mga proseso ng pagtugon.
“Just like in the emergency room, the fast and focused pace of an outbreak response highlights areas for improvement so we can save lives better,” ani Herbosa. “We are looking at adopting processes like Framework Agreements for procurement so that we can buy the vaccines faster,” he explained.
“This is the way forward, even as we exhaust all possible means now to get what we need,” dagdag pa ng kalihim.
Habang hinihintay ang pagdating ng tatlong milyong pentavalent vaccine doses, sinisiguro rin ng DOH ang Diphtheria, Pertussis, at Tetanus (DPT) doses upang mabawasan ang mga potensyal na kakulangan sa bakuna sa Mayo.
Binanggit din ng DOH na ang pribadong sektor ay nagpapanatili ng mga stock ng pentavalent at TDaP vaccines sa merkado ng Pilipinas.
Ang mga rehiyon na nakakaranas ng patuloy na pagtaas ng mga kaso ng pertussis sa nakalipas na anim na linggo ay kinabibilangan ng Cagayan Valley, Central Luzon, Zamboanga Peninsula, Northern Mindanao, Davao Region, at Bicol Region.
Ang mga batang wala pang limang taong gulang ay kumakatawan sa karamihan ng mga kaso ng pertussis sa 76 porsiyento, habang ang mga nasa hustong gulang na 20 taong gulang pataas ay binubuo lamang ng halos apat na porsiyento ng mga kaso. RNT
