DOH: Mungkahing P37.5M ‘collaterals’ para sa PhilHealth 30th anniv tablado

MANILA, Philippines- Hindi inaprubahan ng Board of Directors ng Philippine Health Insurance Corporation (PhilHealth) ang iminungkahing P37.5 milyong allotment para sa collaterals para sa ika-30 anibersaryo ng state insurer sa susunod na taon, sinabi ng Department of Health (DOH) nitong Miyerkules.

Sinabi ng DOH, na nangangasiwa na ahensya ng PhilHealth, na ginawa ang desisyon upang “makatipid ng pondo ng gobyerno at matiyak ang tamang alokasyon nito para sa mga benepisyo ng mga miyembro ng PhilHealth.”

Ang P37.5 milyong halaga ng collaterals sa ilalim ng panukalang “marketing and promotional expenses” para sa selebrasyon ng  30th anniversary ng PhilHealth ay kinabibilangan ng mga sumusunod:

• Jackets — P13,650,000

• Umbrellas — P7,910,550

• Perforated mesh stickers — P7,300,000

• Anniversary shirts — P3,640,000

• Marketing shirts — P1,940,000

• Tote bags — P1,820,000

• Katsa bags — P750,000

• Button pins — P545,000

Sinabi ng DOH na ang opisyal na panukala ay nakarating sa PhilHealth Board of Directors noong Disyembre 16, at “agad na na-veto.”

Sinabi ni Health Secretary Ted Herbosa na siyang board chairman ng health insurer na layunin ng Board na unahin ang pagbibigay ng benepisyo sa mga miyembro ng PhilHealth.

Nauna nang itinanggi ng PhilHealth na naglaan ito ng halos P138 milyon para sa kanilang Christmas party.

Sinabi ng health insurer na mali ang impormasyon ng health advocate na si Dr. Tony Leachon tungkol sa kanyang pahayag na ang PhilHealth ay may labis na badyet sa Christmas party.

Muling iginiit ng PhilHealth noong Martes na umayon ito sa panawagan ni Pangulong Ferdinand “Bongbong” Marcos Jr. na bawasan ang mga selebrasyon ng holiday, at binanggit na naglaan ito ng humigit-kumulang P2 milyon para sa mga aktibidad nito sa pagtatapos ng taon. Jocelyn Tabangcura-Domenden