MANILA, Philippines — Tiniyak ng Department of Labor and Employment (DOLE) na patuloy na matatanggap ng mga empleyado ang kanilang sahod matapos maglabas ng work stoppage order laban sa anim na barko ng Atienza Inter Island Shipping Lines na nakaangkorahe sa Navotas.
Ayon kay Labor Regional Director Atty. Roy L. Buenafe, pansamantalang bawal magtrabaho ang mga empleyado sa mga barkong sakop ng kautusan. Inilabas ang mga order kasunod ng trahedya sa Coron, Palawan noong Setyembre 29, kung saan 77 pasahero ang nasawi.
Sinabi ni Labor Secretary Francis Tolentino na mananatiling suspendido ang operasyon ng mga barko nang walang takdang panahon hanggang matugunan ng kumpanya ang mga kinakailangan sa kaligtasan.
Batay sa work stoppage orders ng DOLE-NCR, isinagawa ang labor inspection noong Oktubre 10, 2026. Kabilang sa mga barkong sakop ng kautusan ang MV November Cattleya, MV December Poinsettia, MV September Tulips, MV October Lavender, MV Star San Carlos, at MV May Lilies.
Maaaring patawan ng administrative penalty na hanggang ₱100,000 ang shipping company kapag hindi sumunod sa kautusan. Hiwalay pa rito ang posibleng mga kasong may kaugnayan sa trahedya ng MV June Aster. Jocelyn Tabangcura-Domenden
