MANILA, Philippines- Ipinaalala ng Department of Labor and Employment (DOLE) na may karapatang tumanggap ng double pay o 200% ng kanilang sweldo ang mga manggagawa sa pribadong sektor na papasok sa trabaho sa Hunyo 12, Araw ng Kalayaan.
Sa labor advisory na inilabas noong Mayo 29, pinaalalahanan ni Department of Labor and Employment (DOLE) Secretary Bienvenido Laguesma ang mga employer na sundin ang mga panuntunan sa pagbabayad para sa holidays sa ilalim ng Proclamation 368, series of 2023, na nilagdaan ni Pangulong Ferdinand R. Marcos Jr.
Kapag pumasok sa araw ng holiday, ang employer ay magbabayad ng 200 porsyento ng pangunahing sahod ng empleyado para sa araw na iyon para sa unang walong oras.
Makatatanggang ang manggagawa ng karagdagang 30 porsyento ng kada oras na rate (oras-oras na rate ng pangunahing sahod x 200% x 130% x bilang ng mga oras na nagtrabaho) kung siya ay nagtrabaho ng higit sa walong oras.
Kung ang ang manggagawa naman ay mag-uulat para sa trabaho sa panahon ng isang regular na holiday na pumapatak din sa araw ng pahinga ng empleyado, babayaran ng employer ang empleyado ng karagdagang 30 porsyento ng pangunahing sahod na 200 porsyento (basic wage x 200% x 130% ).
Kapag nagtrabaho ng lampas sa walong oras sa panahon ng regular na holiday na pumapatak din sa araw ng pahinga ng empleyado, babayaran ng employer ang empleyado ng karagdagang 30 porsyento ng hourly rate sa araw (hourly rate ng basic wage x 200% x 130% x 130% x bilang ng mga oras na nagtrabaho).
Kung ang empleyado naman ay hindi nagtrabaho, ang kompanya ay magbabayad ng 100 porsiento ng kanyang sahod para sa araw na iyon, sa kondisyon na ang empleyado ay mag-uulat para sa trabaho o nasa leave of absence na may bayad sa araw bago ang regular holiday.
Kapag ang araw bago ang regular holiday ay isang araw na walang pasok sa establisimyento o ang nakatakdang araw ng pahinga ng empleyado, siya ay may karapatan sa holiday pay kung ang empleyado ay nag-ulat sa trabaho o nasa leave of absence na may bayad sa araw bago ang araw na walang pasok o araw ng pahinga (basic wage x 100%).
Tuwing Hunyo 12, ginugunita ng mga Pilipino ang kalayaan ng bansa. Ngayong taon, ipinagdiriwang ng bansa ang ika-126 Araw ng Kalayaan. Jocelyn Tabangcura-Domenden
