Home NATIONWIDE DOT: Sa kabila ng tensyon, Tsina nananatiling ‘important market’ sa PH tourism

DOT: Sa kabila ng tensyon, Tsina nananatiling ‘important market’ sa PH tourism

MANILA, Philippines- Nananatiling “important market” ng Pilipinas ang Tsina sa kabila ng nagpapatuloy na tensyon sa South China Sea.

Ang katwiran ng Department of Tourism (DOT), nagpapatuloy na gumagawa ng mahalagang kontribusyon ang Chinese market sa turismo ng Pilipinas.

Sa isinagawang ASEAN Travel Forum (ATF), nag-host ang Tourism Department ng isang media conference na nagpapakita ng pinakabagong updates, achievements, at layunin ng Philippine tourism.

Habang nagsisikap ang bansa para sa patuloy na paglago at pag-unlad partikular na sa industriya ng turismo, naitanong pa rin sa mga opisyal ng DOT kung paano nakaaapekto sa sektor ng turismo ang kasalukuyang tensyon sa pagitan ng Pilipinas at Tsina.

Ang naging tugon ni Verna Esmeralda Buensuseco, Assistant Secretary on Tourism Development Planning, nananatili ang Tsina bilang isa sa ‘key markets’ sa kabila ng territorial dispute sa gitna ng pag-angkin ng Beijing sa South China Sea,

“For China, although yes, there are certain geopolitical situations that are currently prevalent, China continues to be an important market for (the Philippines). China is one of the key markets for tourists,” ang sinabi ni Buensuseco.

“In fact, I think (China) was the third or fourth biggest market in 2024. There are many initiatives that have been undertaken, one is the Cruise Visa Waver Program,” dagdag ng opisyal.

Simula nang napansin aniya nila ang interes sa visa-required individuals na nais na bumisita sa Pilipinas sa pamamagitan ng cruises, kabilang na iyong mga galing sa Tsina, dahilan para kagyat na makipagtulungan ang departamento sa Bureau of Immigration (BI) at Department of Justice (DOJ) na itatag ang programa na magpapagaan sa ‘entry procedures’ sa Pilipinas para sa mga mayroon nang visa requirements.

“China is one of the beneficiaries as well as the other ASEAN nations,” aniya pa rin.

Ang ATF ay isang taunang event kabilang ang three-day Travel Exchange (TRAVEX) mula January 15-17 na kasalukuyang isinasagawa sa Persada Johor International Convention Center.  AngTRAVEX ay ang ‘premier trade show’ na nagpapabilis sa business-to-business meetings at nagpo-promote sa ASEAN tourism products at mga serbisyo.

Nagtipon-tipon sa event ang travel agents at buyers mula ASEAN countries, at maging media representatives mula sa buong mundo. Ang tema ngayong taon ay “Unity in Motion: Shaping ASEAN’s Tourism Tomorrow.”

Ang ATF ay nagsisilbi bilang mahalagang plataporma para sa Association of Southeast Asian Nations (ASEAN) para isulong ang sarili nito bilang ‘unified tourism destination.’

Makakasama ng Philippine delegation ang 17 private sector representatives mula sa tourism industry ng bansa. Kris Jose