Bulacan – Arestado ang 49 anyos na binatang driver na kargado ng baril at lulan ng kahinahinalang puting van sa bayan ng San Rafael.
Kinilala ng pulisya ang naarestong suspek sa alyas Arnold, residente ng Brgy. San Juan, San Ildefinso.
Sa report ng San Rafael police station, naganap ang pagpara ng mga tauhan ng SWAT at 2nd PMFC sa van bandang 4:15 ng hapon nitong Agosto 28 sa Brgy. San Roque.
Ayon sa report, namataan ng mga awtoridad ang van na magkaiba ang plaka kaya pinara nila ito subalit humarurot ito palayo at nasukol din kalaunan.
Dahil dito, hinanapan nila ng lisensiya ang driver subalit pekeng ID o talahib na driver’s license ang ibinigay at nakitaan ng baril sa gawing hita kaya siya tuluyang inaresto.
Sinasabing nagsasagawa ng dragnet operation ang SWAT at 2nd PMFC sa lugar kaugnay sa naganap na robbery incident sa Brgy. Borol 2nd, Balagtas.
Nahaharap sa kaukulang kaso ang suspek habang nakakulong sa nabanggit na istasyon ng pulisya. (Dick Mirasol III)
