Mariing binatikos at kinondena ng Department of Social Welfare and Development (DSWD) ang mga indibidwal na gumagamit ng pekeng kapansanan o nagpapanggap na Persons with Disabilities (PWD) upang makakuha ng mga benepisyo at pribilehiyong hindi naman para sa kanila.
Ayon sa kagawaran, ang ganitong uri ng panloloko ay hindi lamang isang paglabag sa batas, kundi isang malinaw na kawalan ng respeto sa dangal at karapatan ng mga tunay na may kapansanan.
Ayon kay DSWD Assistant Secretary Irene Dumlao, ang mapanlinlang na gawaing ito ay direktang nakakasira sa layunin ng pamahalaan na bumuo ng isang inklusibong lipunan. Binigyang-diin niya na ang mga programa at pasilidad na nakalaan para sa PWD ay idinisenyo para magbigay ng proteksyon at pantay na pagkakataon.
Kapag inabuso ang mga ito ng mga taong walang tunay na pangangailangan, nababawasan ang pagiging epektibo ng mga serbisyong para sana sa mga nangangailangan.
Ang babalang ito ay inilabas matapos mag-viral sa social media ang isang video mula sa TikTok user na si @naughty.perry. Sa nasabing video, ipinakita ang umano’y pagpapanggap ng isang netizen na may kapansanan para makakuha ng priority access sa Manila Light Rail Transit Line 1 (LRT-1). Ang insidenteng ito ay umani ng matinding batikos mula sa publiko na itinuring ang aks-yon bilang pagmamaliit sa hirap na dinaranas ng mga tunay na PWD sa araw-araw na pagbiyahe.
Suportado rin ng DSWD ang National Council on Disability Affairs (NCDA) sa panawagan nitong itigil ang ganitong mga kasanayan. Ipinaalala ng kagawaran na sa ilalim ng Republic Act No. 7277 (Magna Carta for Disabled Persons), ginagarantiyahan ang isang “barrier-free environment.” Obligasyon ng mga pampubliko at pribadong establisimyento na magbigay ng reasonable accommodations — tulad ng pagsasaayos ng pasilidad at priority lanes — upang masiguro ang kaligtasan at ginhawa ng mga vulnerable sectors kabilang ang mga PWD, senior citizens, at mga buntis.
Sa huli, hinimok ng DSWD ang publiko na maging mapagmatyag at maging kaisa sa pagprotekta sa integridad ng mga batas para sa PWD.
Pinaalalahanan ang lahat na ang anomang anyo ng pang-aabuso o iligal na paggamit ng mga pribilehiyo ay maaaring iulat sa NCDA upang mabigyan ng kaukulang aksyong ligal.
