MANILA, Philippines- Itinigil ng Philippine Charity Sweepstakes Office (PCSO) ang operasyon ng e-lotto app nito noong Sabado, Hulyo 13.
Paliwanag sa anunsyo sa e-lotto site, itinigil ang access sa app upang bigyang-daan ang pagsasaayos ng PCSO sa plataporma.
“Starting July 13, 2024, hindi na po kayo makabibili ng lotto tickets through the E-Lotto App. Pero tuloy-tuloy pa rin kayong makabibili ng lotto tickets sa inyong suking lotto outlets,” saad sa abiso.
“Para sa mga e-lotto players na may top-up at winnings sa e-lotto wallets, pinapayuhan namin po kayong i-withdraw na ito on or before July 31, 2024 at 11:59 p.m. para mai-transfer na sa inyong GCash accounts,” dagdag nito.
“Sa mga e-lotto players na may mga advance draw tickets after July 12, 2024, huwag pong mag-alala dahil ang mga tickets na iyan ay valid at kasali pa rin sa ating scheduled draw. Gayunman, pinapayuhan po namin kayo na i-screenshot ang lahat ng inyong advance draw e-lotto tickets on or before July 31, 2024.”
Inilunsad ang pilot program ng PCSO e-lotto noong Disyembre 2023.
Subalit, noong Pebrero, inihirit ni Senator Aquilino “Koko” Pimentel III na ihinto ang pilot tests, dahil umano sa “risks.” RNT/SA
