MANILA, Philippines – Nasa kamay na ng Senado ang kapalaran ng panukalang batas na naglalayong payagan ang e-registration at pagboto ng mga Pilipino sa ibang bansa.
Ito ay matapos na makalusot ito sa House of Representatives sa botong 188-0 para ipasa ang House Bill (HB) 10178 na nag-aamyenda sa Overseas Absentee Voting Act of 2023.
“Ang iminungkahing batas ay nagpapahintulot sa pagpaparehistro, sertipikasyon at paglipat ng pagpaparehistro ng mga botante sa ibang bansa sa pamamagitan ng koreo o sa pamamagitan ng elektronikong paraan, kabilang ngunit hindi limitado sa mga web-based na portal, at iba pang teknolohiyang nakabatay sa internet,” ani House Speaker Martin Romualdez.
Idinagdag niya na kapag naisabatas na ang batas, ang panukala ay magpapapahintulot din sa eletronic voting bilang isang opsyon para sa pagboto sa ibang bansa bukod sa personal at mail-in.
Hinahangad din ng HB 10178 na tanggalin ang awtoridad sa pag-apruba ng Joint Congressional Oversight Committee pagkatapos ng pagsusuri upang payagan ang pagboto sa pamamagitan ng koreo sa isang teritoryo sa ibang bansa.
Pinapalawak din nito ang mga ipinagbabawal na gawain sa ilalim ng batas upang isama ang pagnanakaw, pagtatago, pagbabago, pagsira, mutilation, manipulasyon, at pakikialam ng electronic data o impormasyon. RNT
